Сацыяльная накіраванасць

Забеспячэнне пітной і гарачай вадой, цяплом, транспарціроўка, перакачка і ачыстка сцёкаў, бягучы і капітальны рамонты жыллёвага фонду, вываз і ўтылізацыя смецця — гэта не поўны пералік таго, чым займаюцца камунальнікі. І трэба ўлічваць, што для выканання пастаўленых задач работнікам РЖКГ неабходна не толькі падтрымліваць на належным узроўні, але і мадэрнізаваць сістэмы жыццязабеспячэння. На што патрабуюцца значныя фінансавыя сродкі.

Улічваючы сацыяльную накіраванасць дзяржаўнай палітыкі, большасць камунальных паслуг у краіне яе насельніцтву субсідзіруюцца з бюджэту, а звыш 80 працэнтаў ад агульнага аб’ёму работ РЖКГ прыпадае менавіта на прадастаўленне паслуг жыхарам Ганцаўшчыны. Толькі сёлета бюджэтная субсідыя на кампенсацыю затрат ад аказання паслуг насельніцтву і ўтрымання лазняў склала 22 мільярды 289,2 мільёна рублёў.

Між іншым, камунальнікам, каб захаваць сацыяльныя стандарты і нізкі ўзровень аплаты камунальных паслуг для насельніцтва, даводзіцца працаваць у даволі складаных умовах. “Найбольшая ўдзельная вага ў сабекошце нашых паслуг прыпадае на паліва — звыш 50 працэнтаў, а таксама на электраэнергію — даходзіць да 22 працэнтаў ад агульных расходаў, — адзначае дырэктар раённай жыллёва-камунальнай гаспадаркі Аляксей Галяк. — Зразумела, што даводзіцца лічыць кожны рубель, каб быць на плыву. Таму, улічваючы сітуацыю, нават прыйшлося прадпрыемству перайсці на 4-дзённы рабочы тыдзень, але гэта ні ў якім выпадку не паўплывае на якасць нашых паслуг. Разам з іх прадастаўленнем зараз, як заўжды летам, мэтанакіравана працуем па падрыхтоўцы да ацяпляльнага сезона, працягваем мадэрнізацыю сістэм ацяплення — сёлета неабходна замяніць больш за 3 кіламетры старых труб на прадізаляваныя, што будзе чарговым крокам па зніжэнні цепластрат, а значыць і зніжэнні сабекошту ацяплення…”.

Нагадаем, што на сённяшні дзень кошт адной гікакалорыі цяпла для насельніцтва складае 96 тысяч 424 рублі, а вось яе сабекошт ужо 820 тысяч 451 рубель. Дарэчы, такая ж сітуацыя і ў водазабеспячэнні. Насельніцтву 1 кубічны метр вады абыходзіцца ў 1 тысячу 453 рублі, у той час як яго сабекошт складае 5 тысяч 911 рублёў. Таму не дзіўна, што пытанні рацыянальнага і беражлівага выкарыстання вады, а таксама пытанні энергазберажэння стаяць вельмі востра.

Трэба адзначыць, што дзяржава не толькі субсідзіруе камунальныя паслугі, але і аказвае фінансавую падтрымку грамадзянам у пытаннях забеспячэння сваіх домаўладанняў сучаснымі выгодамі — вадой і газам. Калі расходы па пракладцы газаправода на 70 працэнтаў бярэ на сябе дзяржава з дадатковым выдзяленнем ільготнага крэдыту спажыўцам, то на сённяшні дзень будаўніцтва водаправода фінансуецца на парытэтных умовах, а менавіта, 50 працэнтаў за кошт дзяржавы. Тут размова ідзе аб адвядзенні вадаправода ад цэнтральных водамагістралей, якія, зразумела, будуюцца і абслугоўваюцца за дзяржаўныя сродкі.

У цэлым жа, расходы на камунальныя паслугі кампенсуюцца насельніцтвам менш чым на 30 працэнтаў ад агульных затрат і камунальнікі не толькі забяспечваюць якасную і бесперабойную работу сістэм жыццязабеспячэння, але і мэтанакіравана працуюць над зніжэннем сабекошту сваіх паслуг.

Аляксей ГРУШЭВІЧ.

На здымку: работнікі ўчастка ВіК раённай жыллёва-камунальнай гаспадаркі шчыруюць на пракладцы водаправода па вуліцы Талстога ў райцэнтры.

Фота Алы Пятліцкай.