Прыцягальная сіла зямлі

— На працягу года даводзіцца выконваць розныя работы, — гаворыць механізатар. — Вясной і восенню араць, сеяць, летам нарыхтоўваць кармы, у час жніва адвозіць збожжа ад камбайнаў.

У гэтыя дні Уладзіміра і яго магутны трактар “Джон-Дзір” можна ўбачыць ля сянажных траншэй. Нарыхтоўка кармоў, як і любая работа, патрабуе ўмелых і вопытных спецыялістаў.

Нарадзіўся Уладзімір у вёсцы Чаша Клецкага раёна. Яго бацька працаваў трактарыстам у мясцовым калгасе, маці — паляводам. Яшчэ ў дзяцінстве хлопчык трывала засвоіў спрадвечную ісціну: зямля любіць дбайных. Ён замілавана назіраў, як выходзяць на палі трактары з плугамі, удыхаў на поўныя грудзі непаўторны пах раллі. А якая асалода — пакаштаваць зярняты са спелага жытнёвага коласа!

Пасля дзесяцігодкі Уладзімір скончыў курсы Нясвіжскай аўташколы ДТСААФ па падрыхтоўцы шафёраў. Тэрміновую вайсковую службу праходзіў у аўтамабільных войсках. Дэмабілізаваўшыся, тры гады адпрацаваў вадзіцелем у родным калгасе.

1986 год стаў пераломным у лёсе маладога вяскоўца. Здарылася так, як, напэўна, і павінна здарыцца. Сябар Анатоль Валодзька запрасіў Уладзіміра на сваё вяселле. Яго нявеста была з вёскі Гута. Сярод шматлікіх гасцей Уладзімір прыкмеціў прыгожую, у моднай сукенцы дзяўчыну. Пазнаёміліся, пачалі сустракацца. Яго каханая Ганначка вучылася ў Горацкай сельскагаспадарчай акадэміі. Неўзабаве, праз восем месяцаў, маладыя пабраліся шлюбам.

Тады і зразумеў Уладзімір, што Ганцаўшчына стала для яго другой малой радзімай. Доўгі час працаваў шафёрам, а ў 2000 годзе перасеў на трактар. Маладая сям’я атрымала ад калгаса дыхтоўны цагляны дом у вёсцы Востраў. Зараз яго пакоі час ад часу напаўняюцца звонкімі дзіцячымі галасамі. Гэта ўнучкі Настачка і Маргарытка цешаць дзядуліна і бабуліна сэрцы. Бацька дзяўчынак, старэйшы сын Эдуард, не нарадуецца сямейнаму шчасцю. Дарэчы, ён таксама звязаў сваё жыццё з тэхнікай: працуе механікам на “Гомсельмашы”. Малодшы сын Канстанцін таксама абраў прафесію для сапраўдных мужчын. Ён вучыцца ў Акадэміі Міністэрства ўнутраных спраў Рэспублікі Беларусь.

…Не злічыць, колькі ранкаў і вечароў сустракаў на палетках перадавы механізатар СВК “Крышылавічы” Уладзімір Канановіч. Ён па праву можа сказаць, што ў зямлі ёсць прыцягальная сіла. Так было, так ёсць і так будзе.

Па працы і пашана. 11 чэрвеня Прэзідэнт Беларусі Аляксандр Лукашэнка падпісаў Указ аб узнагароджанні прадстаўнікоў сельскагаспадарчай галіны за шматгадовую плённую працу, значны асабісты ўклад у яе развіццё і дасягненне высокіх вытворчых паказчыкаў. Сярод узнагароджаных медалём “За працоўныя заслугі” ёсць прозвішча і Уладзіміра Канановіча.

Вопытны механізатар не спыняецца на дасягнутым. Больш важкія поспехі і здабыткі ў яго наперадзе.

Міхась АРЭШКА.

НА ЗДЫМКУ: перадавы механізатар СВК “Крышылавічы” Уладзімір Канановіч.