Пад ветразямі “Брыганціны”

Я, кіраўнік аздараўленчага лагера, а таксама бацькі тых дзяцей, якія адпачывалі ў лагеры, засталіся задаволены работай усяго калектыву. Вельмі хочацца выказаць словы ўдзячнасці шчырым, чулым, добразычлівым работнікам ясляў-садка, якія стварылі ідэальныя ўмовы для аздараўлення дзяцей. Менавіта дзякуючы згуртаванаму, таленавітаму калектыву, яго арганізатарскім здольнасцям, тут так цудоўна адпачывалася дзеткам. Атмасфера ў лагеры была заўсёды святочнай, яркай, вясёлай. Дарэчы, па словах дзяцей, тут праводзіліся запамінальныя мерапрыемствы, дзе кожны новы дзень меў сваю тэматыку: дзень знаёмства, дзень гасціннасці, дзень ветлівасці і здароўя, дзень дзяўчынак, дзень экалогіі, дзень хлопчыкаў. З асаблівым жаданнем і цікавасцю дзяўчынкі ўдзельнічалі ў конкурсе “Міс лагера”. Рыхтавалі касцюмы, прычоскі, хваляваліся, безумоўна. “Міс лагера” стала шасцігадовая выхаванка Насця Сарока. А хлопчыкі спаборнічалі за званне “Містэр лагера”. Ім стаў вучань 1 класа Алёша Рабцэвіч, якому 7 гадоў.

Дзеці таксама прымалі ўдзел у розных конкурсах і акцыях, сустракаліся з цікавымі людзьмі. На думку дзяцей, найбольш цікавым быў конкурс малюнкаў на асфальце “Шчаслівае дзяцінства”. У Дзень памяці ахвяр Вялікай Айчыннай вайны, 22 чэрвеня, дзеткі разам з педагогамі зрабілі экскурсію да помніка ахвярам фашызму і ўсклалі кветкі. А яшчэ цікавыя конкурсы чакалі дзяцей у бібліятэцы, работнікі якой правялі мерапрыемства “Вясёлы казачнік”. Рабяты не толькі адказвалі на пытанні, але выступілі ў ролі артыстаў падчас інсцэніроўкі казкі “Три поросёнка”.

Лагер “Брыганціна” меў экалагічны накірунак. Праводзілася віктарына “Лекавыя травы”, конкурс “Экалагічныя сцежкі”, работа па доглядзе кветак — усё гэта давала нашым дзецям тэарэтычныя і практычныя веды.

У канцы кожнага дня дзеці на “парасоне з кропелькамі” адзначалі свой настрой, адлюстроўвалі эмоцыі, уражанні, якія былі толькі станоўчымі.

Было відаць, як радаваліся нашы хлопчыкі і дзяўчынкі. Цудоўны, прыўзняты настрой перадаваўся бацькам. Яны бачылі, якія смачныя стравы для іх дзяцей гатавалі кухары, выхаванцы елі з ахвотай, апетытам. А багатаму і вітаміннаму сталу рабяты абавязаны дзяржаве, якая ў першую чаргу клапоціцца пра самае дарагое — падрастаючае пакаленне. Дзякуючы яе падтрымцы дзеці за зусім нязначны кошт змаглі грунтоўна паправіць сваё здароўе і цудоўна адпачыць.

Тамара Дзямідчык,

 кіраўнік аздараўленчага лагера “Брыганціна”.

НА ЗДЫМКУ: заняткі ў дзіцячым аздараўленчым лагеры “Брыганціна”.