Калі ёсць другасная сыравіна…

У многіх месцах нашага горада ўстаноўлены невялікія кантэйнеры для раздзельнага збору бытавых адходаў — паперы, пластыку і шклабою. На жаль, жыхары не надаюць асаблівай увагі раздзелу другаснай сыравіны. Больш таго, асобныя гараджане ператвараюць кантэйнеры ў звычайныя смеццязборнікі. Па гэтай прычыне камунальнай службе даводзіцца несці дадатковыя фінансавыя затраты на станцыі дасартавання.

Гэта адзін бок справы. Тыя ж пластыкавыя бутэлькі, макулатуру, шклабой і металалом можна без праблем здаць у райспажыўтаварыства і атрымаць грошы.

— У апошні час людзі сталі больш актыўнымі і зацікаўленымі, — гаворыць кладаўшчык Алена Цыган. — За рабочы дзень іншы раз абслугоўваем да 40 здатчыкаў другаснай сыравіны. Акрамя макулатуры жыхары прывозяць лом чорных і каляровых металаў, пэт-бутэлькі, шклабой.

У час прыёму другаснай сыравіны ўзнікаюць і спрэчныя пытанні. Некаторыя абураюцца на справядлівыя заўвагі з нашага боку. Маўляў, чаму ў нас не прымаюць медзь. А між тым каляровыя металы павінны быць ачышчаны ад прымесяў: жалеза, пластмасы, пяску.

Здатчыкі бываюць розныя. Асобныя жыхары дастаўляюць лом чорных бытавых металаў адразу на 1 — 1,5 мільёна рублёў. Аднак у пераважнай большасці людзі прывозяць па 100 — 120 кілаграмаў жалеза. Сярод іх ёсць пастаянныя здатчыкі. У асноўным гэта беспрацоўныя. Яны, як правіла, прыносяць, прычым рэгулярна, кілаграм ці два каляровых металаў або нават і 300 — 400 грамаў. Адыходзяць задаволеныя: грошай хапае не толькі на пачак цыгарэт, але і на бутэльку віна.

Такі кантынгент людзей выклікае падазронасць. Цяжка паверыць, што той жа кавалак медзі чалавек, які вядзе асацыяльны лад жыцця, знайшоў дома, а не “пазычыў” у суседа ці ў каго-небудзь іншага. Прозвішчы здатчыкаў, іх пашпартныя даныя з пералікам здадзенага металу заносяцца ў спецыяльны журнал. Калі другасная сыравіна была ўкрадзена, міліцыя выявіць злодзея даволі лёгка і хутка.

Здараецца, людзі здаюць у макулатуру амаль цалкам хатнюю бібліятэку, якая дасталася ў спадчыну. Пры жаданні сярод макулатуры можна адшукаць цікавыя, нават рарытэтныя кнігі, ілюстраваныя глянцавыя часопісы, карысныя брашуры.

Здадзены металалом складзіруецца на адкрытай пляцоўцы. Макулатура, поліэтыленавая плёнка і пэт-бутэлькі захоўваюцца ў трох памяшканнях. Тут

устаноўлены тры гідраўлічныя пакеціровачныя прэсы. На іх працуюць Сяргей Зялёнка, Леанід Лынша, Надзея Гук і Дзмітрый Шышко. Газетная і ўпаковачная папера, поліэтыленавая плёнка і пэт-бутэлькі цюкуюцца, а кнігі, часопісы складваюцца ў вялікія стосы. Падрыхтаваная другасная сыравіна дастаўляецца для перапрацоўкі на Слонімкі кардонна-папяровы завод.

Якія ж цэны на сённяшні дзень, ці прывабныя яны для здатчыкаў? Мяркуйце самі. Найбольш дорага каштуе медзь. Адзін кілаграм яе “цягне” на 59 тысяч 500 рублёў. Значна папоўніць ваш кашалёк можа латунь — ад 33 тысяч 450 рублёў да 36 тысячы 200 рублёў за кілаграм. Цана залежыць ад вырабаў з гэтага металічнага сплаву. Кілаграм свінцу з акумулятарных батарэй каштуе 14 тысяч 350 рублёў, цынку з карбюратараў — 8 тысяч 500 рублёў, алюмініевы дрот і бытавы посуд, калі яны ў вас ёсць, прымуць па 12 тысяч 950 рублёў за кілаграм, іншыя рэчы з алюмінію і дзюралюмінію — па 10 тысяч 850 рублёў. І, нарэшце, замыкаюць гэты пералік чыгун (1 тысяча 450 рублёў за кілаграм) і лом чорных бытавых металаў (1 тысяча 150 рублёў).

Асобна назавём кошт аднаго кілаграма поліэтыленавай плёнкі, макулатуры і шклабою: адпаведна 1000, 800 і 600 рублёў. Прычым аконнае шкло тут не прымаюць. Яго бярэ на бязвыплатнай аснове раённая жыллёва-камунальная гаспадарка.

Прыём другаснай сыравіны ў райспажыўтаварыстве ажыццяўляецца штодзённа, акрамя суботы і нядзелі. Графік работы: 9.00 — 13.00, 14.00 — 16.00.

Калі ў вас дома ёсць макулатура, шкляныя і поліэтыленавыя бутэлькі, не спяшайцеся выкідваць іх. Тым больш, гэта датычыцца чорных і каляровых металаў. Акуратна збярыце другасную сыравіну і здайце для перапрацоўкі на прыёмныя пункты. Карысць будзе ўзаемная: і вам, і навакольнаму асяроддзю.

У цяперашні час праблема засмечвання прылягаючых тэрыторый вельмі вострая. Пакінем жа будучым пакаленням здаровую і квітнеючую прыроду!

Міхась АРЭШКА.

НА ЗДЫМКАХ:  ля гідраўлічнага пакеціровачнага прэса  Сяргей Зялёнка.

Фота аўтара.