Здароўе — залог поспеху

Галіна Шчыткоўская працуе ўрачом-афтальмолагам вось ужо 28 гадоў. Па асабістым прызнанні, ні разу не пашкадавала, што поўнасцю аддала сябе медыцыне. Розныя выпадкі бывалі ў прафесійнай практыцы гэтай жанчыны, але за амаль трыццаць гадоў ніводны пацыент не зможа пакрануць гэтага спецыяліста.

У медыцыну Галіна Уладзіміраўна прыйшал па натхненні: яе матуля некалі была афтальмолагам у Ганцавіцкай цэнтральнай раённай бальніцы, а бацька — спачатку галоўным урачом, затым загадчыкам хірургічнага аддзялення, а пасля выхаду на пенсію працягваў працаваць хірургам. Дынастыю медыкаў прадоўжыла Галіна, скончыўшы Мінскі дзяржаўны медыцынскі інстытут (зараз Беларускі дзяржаўны медыцынскі ўніверсітэт) у 1987 годзе. Ёй, як маладому спецыялісту, прапанавалі месца маці, на якім Галіна Шчыткоўская працуе і па сённяшні дзень.

На пытанне, ці ёсць складанасці ў рабоце ўрача-афтальмолага менавіта ў Ганцавічах, гэтая сціплая і далікатная жанчына адказвае: “Галоўная цяжкасць заключаецца ў тым, што ў нашай паліклініцы спецыяліст майго профілю ўсяго адзін — я, а таму нагрузка, наплыў людзей вельмі вялікі. Бывае, што за дзень прыходзіцца прыняць больш за 80 чалавек, а зараз, з пачатку сезона паступлення ў навучальныя ўстановы, дык і за сотню перавальвае. А так, іншых праблем і складанасцей я не бачу”.

І сапраўды, кабінет абсталяваны новымі прыборамі дыягностыкі і лячэння, якія набыты ў мінулым годзе. Так, з’явіўся новы рэфрактометр, з дапамогай якога вызначаюць праламляючую сілу вока чалавека, што выкарыстоўваецца ўрачом для дыягностыкі такіх захворванняў, як блізарукасць, дальназоркасць і астыгматызм. Дапамагае ў дыягностыцы і новы бескантактны танометр, які вымярае ціск вадкасці ўнутры вочнага яблыка. Гэта вельмі важны тэст пры ацэнцы пацыентаў, падвержаных рызыцы глаўкомы. Па словах Галіны Шчыткоўскай, гэтыя прыборы значна аблегчылі нялёгкую работу афтальмолага. У планах таксама — замена шчыліннай лямпы на новую.

Пры такім вялікім наплыве людзей міжволі ўзнікае пытанне: ці ёсць цяжкасці ва ўзнаемаадносінах паміж урачом і пацыентамі? Як прызнаецца Галіна Уладзіміраўна, бывае ўсякае: “Па большай ступені, канечне, людзі, якія прыходзяць на прыём, адносяцца да вялікіх чэргаў з разуменнем, але ёсць і такія, хто не жадае чакаць. Раней было неяк лягчэй у плане маральным, пацыенты былі больш цярпімыя, лаяльныя. А зараз, наадварот, патрабуюць і патрабуюць…”

Але ўсё ж такі Галіна Шчыткоўская цвёрда ўпэўнена, што ніякія складанасці не перакрэсляць адчування значнасці, адказнасці за здароўе людзей. І сотні “Дзякуй!” ад удзячных пацыентаў вартыя таго, каб пераадольваць іх зноў і зноў.

Работу Галіны Шчыткоўскай, яе прафесіяналізм і адданасць справе цэняць не толькі пацыенты, але і адміністрацыя Ганцавіцкай цэнтральнай раённай бальніцы. А таксама і Міністэрства аховы здароўя, грамату якога Галіне Уладзіміраўне ўручылі 16 чэрвеня ў Брэсце ў палацы прафсаюзаў.

Напярэдадні прафесійнага свята, Дня медыцынскіх работнікаў, Галіна Уладзіміраўна выказала словы віншавання цудоўнаму калектыву бальніцы, пажадала, у першую чаргу, здароўя. Бо менавіта яно з’яўляецца самым каштоўным багаццем чалавека і залогам поспеху.

Ксенія ЛУЦКО.