Асцярожна: фальшыўкі!

На сённяшні дзень па Брэсцкай вобласці зарэгістраваны 52 факты фальшываманецтва. За аналагічны перыяд мінулага года — 36. Як адзначылі ў УБЭП Брэсцкага аблвыканкама, у 41 зарэгістраваным выпадку збыту падробныя грашовыя знакі ўвезены на тэрыторыю Рэспублікі Беларусь з-за мяжы так званымі “добрасумленнымі збытчыкамі” з Расійскай Федэрацыі (32 факты), Украіны (7 фактаў) і Польшчы (3 факты). З наступленнем летняга перыяду назіраецца рост падобных выпадкаў, напрыклад, зарэгістраваны выпадкі, калі з курортных краін турысты прывозяць падробкі.

Як падкрэсліў начальнік УБЭП УУС Віктар Водчыц, значны ўплыў на такую абстаноўку аказвае свабодная міграцыя насельніцтва, у сувязі з чым асноўная маса падробнай замежнай валюты ўвозіцца з-за мяжы. У большасці выпадкаў увоз адбываецца ў прыватным парадку, гэты значыць, грамадзянамі, якія працуюць за мяжой і ездзяць з турыстычнымі мэтамі, наведваюць родных і блізкіх, а таксама прадпрымальнікамі, якія закупляюць імпартны тавар.

Часцей за ўсё сустракаюцца падробныя расійскія рублі наміналам “1000 рублёў” і “5000 рублёў”, долары ЗША купюрамі па “100 долараў”, а таксама еўра наміналам “50 еўра” і “20 еўра”.

Акрамя гэтага, неабходна адзначыць, што часта ў сітуацыях з фальшыўкамі вінаватыя самі грамадзяне. Напрыклад, тыя, хто ў парушэнне ўстаноўленага парадку правядзення валютных аперацый, ажыццяўляюць продаж кватэр, аўтамабіляў, мабільных тэлефонаў і іншых таварна-матэрыяльных каштоўнасцей невядомым асобам за замежную валюту, пры гэтым адразу не правяраюць сапраўднасць атрыманых банкнот. У некаторых выпадках легкадумнасцю грамадзян карыстаюцца так званыя “валютчыкі”, да паслуг якіх, на жаль, некаторыя часам прыбягаюць.

Калі вы прынеслі на абмен падробную купюру, то па гэтым факце назначаецца праверка, у ходзе якой вырашаецца пытанне аб узбуджэнні крымінальнай справы. Супрацоўнікі міліцыі нагадваюць, что за выраб і збыт фальшывых грошай прадугледжана крымінальная адказнасць — да 15 гадоў пазбаўлення волі з канфіскацыяй маёмасці, таму што такое злачынства адносіцца да катэгорыі цяжкіх.

Аляксандра ЗАХАРАВА, інспектар аддзялення інфармацыі і грамадскіх сувязей УУС Брэсцкага  аблвыканкама.