Стартаваў чэмпіянат раёна па футболе

У мінулыя выхадныя трыма гульнямі ў Ганцавічах, Люсіне і Чудзіне стартаваў чарговы адкрыты чэмпіянат раёна па футболе.

Сёлета ўдзел у раённым першынстве прымаюць 9 каманд. Асноўнымі фаварытамі турніру, як і ў мінулым годзе, можна лічыць каманды з райцэнтра “Атлант” і “Будаўнік — ПМК-14”, а таксама “Хатынічы”, якія ў матчы за суперкубак раёна даволі нечакана разграмілі “будаўнікоў” з лікам 4:1. І калі першыя дзве каманды гульні стартавага тура прапускалі, то вось хатыніцкія футбалісты прыпаднеслі сваім прыхільнікам непрыемны сюрпрыз.

У матчы супраць каманды “Партызан” з Чудзіна “Хатынічы” даволі нечакана пацярпелі буйное паражэнне з лікам 0:3. Адзначым, што склад чудзінскіх футбалістаў у гэтай сустрэчы узмацнілі некалькі “легіянераў” з Мінскай вобласці. Гледзячы на вынік вышэйзгаданага паядынку, можна меркаваць, што калі “Партызан” будзе збіраць такі аптымальны склад і на астатнія гульні чэмпіянату раёна, то чудзінская каманда ўсур’ёз можа пазмагацца за прызавыя месцы.

У Люсіне паміж сабой сустракаліся мясцовая каманда і футбалісты “Арбіты” з Азярэчча. Госці з Клецкага раёна спрабавалі на роўных змагацца са сваім сапернікам, аднак гаспадары ўсё ж такі выглядалі мацней. У выніку люсінскія футбалісты атрымалі ўпэўненую перамогу з лікам 5:2.

У Ганцавічах мясцовы “Сатурн” гуляў супраць каманды “Аверслес” з Малькавіч. Госці адкрылі лік у сустрэчы, але захаваць сваю перавагу ім не ўдалося. Фінальны свісток арбітра зафіксаваў перамогу ганцавіцкай каманды з лікам 3:2. У гаспадароў два мячы на свой рахунак запісаў Алег Кладзько.

Гульні другога тура чэмпіянату раёна па футболе пройдуць 20 і 21 чэрвеня.

Уладзімір САКАЛОЎ.