З АПЕРАТЫЎНЫХ ЗВОДАК ТЫДНЯ: крадзяжы, гандлярства самагонам і п’яныя вадзіцелі

Справы крымінальныя

3 чэрвеня па матэрыялах Ганцавіцкага РАУС была ўзбуджана крымінальная справа ў адносінах жыхара вёскі Раздзялавічы, 1972 года нараджэння, раней неаднаразова судзімага. Мужчына 20 мая пранік у падсобнае памяшканне, размешчанае на тэрыторыі неэксплуатуемай кацельні Ганцавіцкага РЖКГ у вёсцы Раздзялавічы, дзе з агрэгата, устаноўленага для чысткі ёмістасцей, украў электрарухавік, коштам амаль 2 мільёны рублёў.

А 4 чэрвеня была ўзбуджана яшчэ адна крымінальная справа ў адносінах невядомай асобы, якая ў перыяд часу з 29 мая па 3 чэрвеня шляхам распілу металічнай дужкі навяснога замка з дзвярэй гаспадарчага будынка ў вёсцы Малькавічы пранікла ў будынак і ўкрала тры сякеры, 10 кілаграмаў цвікоў, электрычны рухавік ад дрэваапрацоўчага станка. Матэрыяльны ўрон уладальніку маёмасці склаў 3 мільёны 525 тысяч рублёў.

Захацелася кваску…

У чацвер, 4 чэрвеня, у аператыўна-дзяжурную службу Ганцавіцкага РАУС паступіла паведамленне ад прадаўца магазіна № 5 “Журавушка” аб тым, што ў перыяд часу з 3 па 6 чэрвеня невядомая асоба з абрашочанай часткі каля гандлёвага павільёна, шляхам зрыву навяснога замка, украла 8 бутэлек квасу, ёмістасцю па 1,5 літра.

Праверку праводзіць РАУС.

Самагоншчыкі і іх кліенты

У гэты ж дзень а 10 гадзіне вечара паступіў рапарт участковага інспектара міліцыі аддзялення аховы правапарадку і прафілактыкі Ганцавіцкага РАУС аб тым, што некалькімі гадзінамі раней у вёсцы Раздзялавічы ім затрыманы жыхар той жа вёскі, 1977 года нараджэння, у якога пры сабе знаходзілася ёмістасць 1,5 літра з вадкасцю з характэрным пахам самагонкі.

І амаль у той жа час паступіў рапарт начальніка аддзялення аховы правапарадку і прафілактыкі аб тым, што ў 19.40 у ходзе санкцыянаванага пракурорам Ганцавіцкага раёна агляду домаўладання жыхаркі вёскі Раздзялавічы, 1969 года нараджэння, было знойдзена 2 літры моцнага алкагольнага напою — самагонкі.

Падрабязнасці высвятляюцца.

Спроба не ўдалася

6 чэрвеня ў аператыўна-дзяжурную службу Ганцавіцкага РАУС паступіў рапарт аб тым, што супрацоўнікам міліцыі быў затрыманы правапарушальнік, які спрабаваў украсці бутэльку гарэлкі з магазіна “Хлебасолле”.

Украў кашалёк

7 чэрвеня ў дзяжурную часць РАУС паступіла паведамленне ад жыхаркі вёскі Любашава аб тым, што напярэдадні ноччу да яе ў хату прыйшоў аднавясковец і ўкраў кашалёк з грашыма ў суме 2 мільёны 300 рублёў.

Праводзіцца праверка.

СВЯТЛАФОР ДАІ

За кіраванне транспартным сродкам у стане алкагольнага ап’янення затрыманы:

Дзмітрый Мікалаевіч Ленкавец, 1982 года нараджэння, жыхар горада Ганцавічы, кіраваў аўтамабілем “Мэрсэдэс 300”.

Аляксандр Анатольевіч Журавель, 1981 года нараджэння, жыхар горада Ганцавічы, кіраваў мікрааўтобусам “Форд-Транзіт”.

Уладзімір Майсеевіч Вайтовіч, 1957 года нараджэння, жыхар горада Лунінец, кіраваў аўтамабілем “Пежо”.

Дзмітрый Сяргеевіч Карпеня, 1994 года нараджэння, жыхар горада Ганцавічы, кіраваў аўтамабілем “Сітраен Ксара Пікасо”.

Зводку чытала Ксенія ЛУЦКО.