Майстры сякеры і пілы

На старт выйшлі вальшчыкі лесу Руслан Лагвіновіч з майстарскага ўчастка № 1, Сяргей Швайка з Дзяніскавіцкага, Васіль Махнавец з Круговіцкага, Сяргей Канановіч з Ялоўскага, Уладзімір Цыбулька з Малькавіцкага, Віктар Шышко з Ганцавіцкага, майстар лесу Аляксандр Дайлід з Боркаўскага, леснікі Уладзімір Занька з Люсінскага, Мікалай Дайлід з Чудзінскага, Уладзімір Макарскі з Раздзялавіцкага і Мікалай Наумік з Хатыніцкага лясніцтваў.

Удзельнікі паказвалі набытыя веды і прафесійныя навыкі ў пяці конкурсных аперацыях: валцы дрэў, камбінаванай і дакладнай раскрыжоўцы, абрэзцы сучкоў і мантажу цэпу бензапілы. Перад пачаткам галоўны ляснічы Ігар Шыйч пазнаёміў прысутных з умовамі спаборніцтваў, пажадаў поспехаў.

На адведзенай дзялянцы ў Люсінскім лясніцтве шляхам жараб’ёўкі кожнаму вальшчыку “дасталася” гонкая векавая сасна. На працягу дзесяці мінут неабходна было вызначыць накірунак, у які будзе падаць дрэва, спілаваць яго такім чынам, каб ствол лёг дакладна ва ўказаную кропку. Улічвалася літаральна ўсё: адхіленне дрэва ад зададзенага накірунку падзення, глыбіня і вугал падпілу, пашкоджанне ствала і г. д. Нягледзячы на парывы ветру, большасць удзельнікаў паспяхова справіліся з гэтым  даволі нялёгкім заданнем.

У Ялоўскім лясніцтве вальшчыкаў лесу чакалі новыя выпрабаванні. Трэба было праявіць асаблівы спрыт і ўменне пры камбінаванай і дакладнай раскрыжоўцы сасновага ствала, хутка і правільна выканаць мантаж бензапілы. За бездакорныя дзеянні налічваліся самыя высокія балы.

Амаль пяць гадзін доўжыліся спаборніцтвы лепшых вальшчыкаў лесу. Яны праводзіліся ў мэтах павышэння прафесійнага майстэрства, распаўсюджвання перадавога вопыту, папулярызацыі і павышэння прэстыжу прафесій лесаводаў. Інакш кажучы, трэба было правесці ўпэўнены росчырк бензапілой, без сучка і задзірынкі.

Менавіта так, дзелавіта і па-майстэрску, справіўся з усімі патрабаваннямі ляснік Чудзінскага лясніцтва Мікалай Дайлід. Ён стаў абсалютным пераможцам. Другое і трэцяе месцы занялі адпаведна майстар лесу Боркаўскага лясніцтва Аляксандр Дайлід і вальшчык лесу Ялоўскага лясніцта Сяргей Канановіч. Усе яны ўзнагароджаны грашовымі прэміямі і атрымалі права ўдзельнічаць у абласных спаборніцтвах, якія адбудуцца на базе Драгічынскага лясгаса 10 ліпеня.

Міхась АРЭШКА. Фота аўтара.