З АПЕРАТЫЎНЫХ ЗВОДАК ТЫДНЯ: шкода лясніцтву амаль на 8 мільёнаў, «хатні алкаголь» і іншыя здарэнні

Украў грошы

У сераду, 13 мая, узбуджана крымінальная справа ў адносінах жыхара вёскі Агарэвічы, раней судзімага непрацуючага мужчыны, 1976 года нараджэння. Ён 11 красавіка выбіў акно ў доме па вуліцы Садовай у Агарэвічах і ўкраў грошы ў суме 670000 рублёў.

Шкода лясніцтву

14 мая ўзбуджана крымінальная справа ў адносінах невядомай асобы, якая, пашкодзіўшы агароджу, пранікла на тэрыторыю пастаяннага базіснага заказніка Круговіцкага лясніцтва ДЛГУ “Ганцавіцкі лясгас”, размешчанага ў лясным масіве каля вёскі Мельнікі. Злодзей украў 13 касет, 0,6 рулона поліэтыленавай плёнкі, 31 саджанец туі заходняй, 2 саджанцы спірэі, 50 саджанцаў кізільніку бліскучага, 16 саджанцаў чубушніку вянечнага, 8 саджанцаў фарзіцыі, 262 саджанцы буякоў. Агульная матэрыяльная шкода, нанесеная ДЛГУ “Ганцавіцкі лясгас” склала 7 мільёнаў 690 тысяч 684 рублі.

Сілай адабраў

У пятніцу, 15 мая, па матэрыялах Ганцавіцкага РАУС узбуджана крымінальная справа ў адносінах жыхара вёскі Малькавічы, 1987 года нараджэння. Мужчына, будучы неаднаразова судзімым, у стане алкагольнага ап’янення пранік у дом па вуліцы Задубенскай у Малькавічах, дзе, з прымяненнем насілля, адкрыта ўкраў у гаспадыні 1 мільён рублёў.

Бацькі і дзеці

У гэты ж дзень была ўзбуджана крымінальная справа ў адносінах да грамадзяніна, 1983 года нараджэння, жыхара вёскі Чудзін. 18 красавіка ён, знаходзячыся ў п’яным стане, наўмысна пабіў свайго бацьку, 1960 года нараджэння з-за асабістых негатыўных адносін да яго. Пацярпеўшы атрымаў цялесныя пашкоджанні ў выглядзе закрытага пералому рэбраў і адкрытага пералому касцей носа.

“Хатні” алкаголь

15 мая паступіў рапарт начальніка аддзялення прафілактыкі і аховы правапарадку Ганцавіцкага РАУС аб тым, што ў домаўладанні жыхаркі вёскі Шашкі былі выяўлены алкагольныя напоі — віно пладова-ягаднае і гарэлка, агульным аб’ёмам 10,7 літра. Таксама было ўстаноўлена, што жанчына, карыстаючыся тым, што ў гэты дзень продаж алкагольнай прадукцыі ў горадзе і раёне быў забаронены, наладзіла свой “малы бізнэс”. А менавіта, прадавала алкаголь жадаючым па завышанай цане.

Праверку па справе праводзіць РАУС.

Зводку чытала Ксенія ЛУЦКО.