Сустрэча з балельшчыкамі

Напярэдадні адкрыцця сезона футбольны клуб “Ганцавічы” правёў таварыскі матч з мінулагоднім чэмпіёнам раёна

“Будаўніком — ПМК-14”. Сустрэча насіла эксперыментальны характар. На зялёным газоне ў час гульні праходзілі дэталёвы прагляд як ігракі асноўнага саставу каманд, так і запрошаныя навічкі. Зразумела, што кожны футбаліст імкнуўся паказаць свае здольнасці і добрую фізічную падрыхтоўку. На ўсіх участках, як у атацы, так і абароне, вялася вострая, эмацыянальная барацьба.

У сярэдзіне першага тайма сапернікі абмяняліся галамі. Спачатку нападаючы “Будаўніка” Аляксандр Дайлід трапным ударам адкрыў лік — 1:0. Літаральна праз мінуту яго калега па амплуа Юрый Мелехавец аднавіў раўнавагу — 1:1. Нічыйны лік трымаўся доўга. Змяніць яго ў другім тайме на карысць ФК мог Уладзімір Куцый, аднак прабіў пенальці вышэй варот. Затое ў аналагічнай сітуацыі ігрок “Будаўніка” Дзмітрый Лексакоў шанц не ўпусціў і прынёс перамогу сваёй камадзе — 2:1.

Адзначым упэўненыя дзеянні абодвух варатароў. Антон Жукоўскі і Сяргей Рабцэвіч неаднаразова выходзілі пераможцамі ў барацьбе з нападаючымі сапернікаў.

З абмеркавання саставаў каманд пачалася сустрэча з балельшчыкамі. Яна адбылася ў гарадскім кінатэатры “Маладосць”. Мясцовых прыхільнікаў абедзвюх каманд, аддадзеных аматараў футбола хвалявалі многія праблемы. Яны датычыліся не толькі канкрэтных ігракоў, але і судзейства, фінансавання каманд, вызначэння канчатковых саставаў.

У час зацікаўленага дыялогу было вырашана фарміраваць “касцяк” абласной і раённых каманд з мясцовых футбалістаў, колькасць так званых “легіянераў” не павінна перавышаць трох — чатырох чалавек. Прычым, тыя, хто гуляе ў чэмпіянаце вобласці, не маюць права выступаць у раённых спаборніцтвах.

Галоўны трэнер ФК “Ганцавічы” Андрэй Жалезны падкрэсліў, што каманда ствараецца практычна з нуля. Яшчэ не поўнасцю вызначаны яе канчатковы састаў. Праведзены таварыскі матч толькі акрэсліў контуры. Атрымалі запрашэнне і далі папярэднюю згоду выступаць за футбольны клуб ганцавіцкія выхаванцы Ілья Мурашка, Іван Вадап’ян, Алег Берташ, Яўген Рабцэвіч, Андрэй Болбат, Іван Кот, Андрэй Іванісеня, шэраг іншых ігракоў. Ставіцца задача-максімум заняць прызавое месца. Адна з галоўных мэт — “абкатаць” футбалістаў, стварыць дзеяздольную, згуртаваную каманду.

Прыемна, што ветэраны ганцавіцкага футбола з ахвотай згадзіліся ўручаць прызы лепшым ігракам матчаў як абласнога, так і раённага ўзроўню. Пераемнасць пакаленняў — справа патрэбная і карысная.

Міхась АРЭШКА.