Пляжныя злачынцы

15 мая на Ганцаўшчыне адкрыўся купальны сезон. І калі для простых жыхароў горада і раёна гэтая навіна выклікала радасць і прадчуванне цудоўнага адпачынку, то для супрацоўнікаў праваахоўных органаў пачынаецца сапраўды “гарачая” пара. Уся справа ў тым, што з пачаткам купальнага сезона павялічваецца колькасць крадзяжоў на пляжах раёна. Згодна статыстыкі такі від злачынства вельмі распаўсюджаны ў летні перыяд.

Як расказвае начальнік аддзялення аховы правапарадку і прафілактыкі Ганцавіцкага РАУС Віталь Чабатарэнка адрозніць злачынцу ад простага адпачываючага вельмі цяжка. Як правіла, сваю будучую ахвяру ён выбірае загадзя: прыглядаецца да людзей на пляжы, да іх маёмасці. “На вока” вызначае, у каго з сабой дарагі мабільны тэлефон, фотаапарат, кашалёк з грашыма, упрыгожванні з каштоўных металаў, а потым, калі грамадзяне ідуць купацца, непрыкметна здзяйсняе крадзеж. Бяда ў тым, што адпачываючыя, калі ідуць у ваду, часта пакідаюць свае рэчы на пляжы, кладуць пад пакрывала або ў сумку, а гэта даволі легкадумна і небяспечна.

— Што неабходна зрабіць, каб не трапіць у поле зроку злачынцы?

— Каб не стаць ахвярай крадзяжу на пляжы неабходна памятаць некаторыя правілы. Не варта браць з сабою на пляж шмат грошай — невялікай іх сумы будзе дастаткова каб набыць, напрыклад, напітак ці марожанае. Пярсцёнкі, бранзалеты і гадзіннікі на пляж і ўвогуле варта не браць.

Мабільныя тэлефоны, ноутбукі і іншую тэхніку таксама не абавязкова несці з сабой — упэўнены, што адпачыць з сябрамі і пабыць гадзіну-другую без сродкаў тэхнічнага прагрэсу — можна.

Што датычыцца фотаапаратаў, то, зразумела: знаходзячыся на адпачынку хочацца захаваць у памяці кожную хвіліну. Але калі ідзеш на пляж адзін, то я б рэкамендаваў абысціся без фотаапарата, або адмовіцца ад купання.

— Калі ж усё-такі каштоўныя рэчы былі прынесены на пляж?

— Не пакідайце іх без увагі, заўсёды трымайце ў полі свайго зроку. Пастарайцеся не засынаць на пляжы, закрываючы твар ад сонечных промняў. Па магчымасці, адпачывайце ў кампаніі сяброў: будзе каму прыглядзець за рэчамі, а купацца можна хадзіць па чарзе. І, канешне, не злоўжывайце спіртнымі напіткамі — у п’янага чалавека ўкрасці намнога лягчэй, чым у цвярозага.

Ксенія ЛУЦКО.