ГІСТОРЫЯ І СУЧАСНАСЦЬ

Ганцавіцкая раённая агранізацыя РГА “Белая Русь” сумесна з аддзелам ідэалагічнай работы, культуры і па справах моладзі

У рамках 70-годдзя Вялікай Перамогі дэлегацыя наведала Музей гісторыі Вялікай Айчыннай вайны. Будынак музея адкрыўся каля года таму, і да гэтага часу экспанаты, якія знаходзяцца ў ім, рэканструююцца, а іх колькасць расце. Экскурсанты на свае вочы ўбачылі танкі, баявыя машыны пяхоты, самалёты і іншую тэхніку, пазнаёміліся з прадметамі, якія належалі героям вайны, з побытам і сродкамі барацьбы партызан — увогуле, даведаліся больш пра тое, як год за годам развіваліся падзеі падчас Вялікай Айчыннай вайны. Экскурсавод змог зацікавіць кожнага з наведвальнікаў і з задавальненнем адказваў на ўсе пытанні. Пасля наведвання музея экскурсанты доўга з хваляваннем абмяркоўвалі ўбачанае.

Аднак на гэтым дзень у Мінску не завяршыўся. Наперадзе ў актыву раённай арганізацыі РГА “Белая Русь” была вельмі важная падзея — сустрэча з прадстаўнікамі Рэспубліканскага савета грамадскай арганізацыі “Белая Русь”.

Спачатку дэлегацыю сустрэла начальнік аддзела арганізацыйна-кадравай работы Таццяна Шэндзік. Яна прадэманстравала стэнды, на якіх адлюстравана ўся асноўная дзейнасць “Белай Русі” — праца грамадскіх прыёмных, удзел у выбарчых кампаніях, работа з актывам, акцыі і мерапрыемствы, міжнароднае супрацоўніцтва, а таксама старонкі гісторыі грамадскай арганізацыі. Потым актыў Ганцавіцкай раённай арганізацыі сустрэўся з намеснікам старшыні РГА “Белая Русь” Аляксандрам Шацько і старшынёй цэнтральнай кантрольна-рэвізійнай камісіі Уладзімірам Дзянісавым. Аляксандр Віктаравіч падрабязна расказаў дэлегатам аб тым, як арганізавана праца з раённымі і іншымі арганізацыямі “Белай Русі”, а таксама адзначыў тыя асноўныя напрамкі, па якіх павінна працаваць арганізацыя нашага раёна. Старшыня Ганцавіцкай раённай арганізацыі РГА “Белая Русь” Віктар Супрун адзначыў, што многія з гэтых напрамкаў ужо знаходзяцца ў распрацоўцы, а астатнія абавязкова рэалізуюцца ў бліжэйшы час.

Уражанні ад паездкі ва ўсіх удзельнікаў дэлегацыі засталіся самыя станоўчыя. Музей гісторыі Вялікай Айчыннай вайны ўсіх уразіў сваёй веліччу і колькасцю ўнікальных рэчаў, якія захоўваюцца ў ім, а наведванне Рэспубліканскага савета РГА “Белая Русь” прынесла шмат пазітыву, зносін з цікавымі людзьмі і новых, карысных ідэй.

Аляксандра ГУРМАН. Фота аўтара.