Пераможца алімпіяды

Алімпіяда ФПМІ мае даўнія традыцыі: у гэтым годзе яна праходзіла ўжо 24 разы. Яна складаецца з дзвюх узаемазвязаных частак: творчай алімпіяды па матэматыцы для вучняў 7 — 10 класаў і алімпіяды па матэматыцы і інфарматыцы для 11 класаў (у рамках алімпіяды “Абітурыент БДУ-2015”).

Праходзіла алімпіяда ў два туры. Першы быў завочным: удзельнікам неабходна было рашыць прапанаваныя задачы і выслаць іх у аргкамітэт. Для ўдзелу ў другім, заключным туры былі запрошаны лепшыя ўдзельнікі завочнага тура, а таксама (без папярэдняга адбору) пераможцы і прызёры алімпіяды ФПМІ-2014 сярод вучняў 7 — 10 класаў, пераможцы абласных алімпіяд школьнікаў па матэматыцы, інфарматыцы, фізіцы і астраноміі, удзельнікі заключнага этапа Рэспубліканскай алімпіяды школьнікаў па гэтых прадметах. Як прызёр абласнога і ўдзельнік заключнага этапа Рэспубліканскай алімпіяды па матэматыцы і быў запрошаны Аляксандр Камароў на алімпіяду ФПМІ.

Заключны тур праходзіў у г. Мінску на факультэце прыкладной матэматыкі і інфарматыкі БДУ 25 — 26 красавіка. У ім прынялі ўдзел 85 рабят з усіх абласцей рэспублікі. Паспяхова справіўшыся з шасцю прапанаванымі і далёка не простымі задачамі і набраўшы 21 бал з 26 магчымых, наш Саша стаў пераможцам гэтай алімпіяды! За што і быў узнагароджаны дыпломам і падарункам — кнігай “Нестандартныя задачы па матэматыцы ў 7 — 11 класах”, майкай і значком з лагатыпам спартыўна-аздараўленчага комплексу “Брыганціна” Беларускага дзяржаўнага ўніверсітэта. А ўзнагароды ён атрымаў з рук Барыса Задворнага, кандыдата фізіка-матэматычных навук, намесніка дэкана па прафарыентацыі і дадатковай адукацыі.

Цяпер Саша як пераможца атрымлівае права без папярэдняга адбору ўдзельнічаць у заключным туры алімпіяды па матэматыцы і інфарматыцы ў наступным навучальным годзе. А яшчэ ён атрымлівае права ўдзельнічаць у юбілейнай 20 Рэспубліканскай летняй навукова-даследчай школе вучняў і настаўнікаў, якая пройдзе 13 — 30 ліпеня гэтага года на базе лагера “Брыганціна”.

Алена ЦЫГАН,

намеснік дырэктара па вучэбнай рабоце ДУА “Сярэдняя школа № 1 г. Ганцавічы”.

НА ЗДЫМКУ: Саша Камароў.

Фота з архіва ўстановы.