Стартаваў адкрыты футбольны турнір “Кубак пераможцаў”, прысвечаны 70-годдзю Перамогі ў Вялікай Айчыннай вайне

У спаборніцтвах прымаюць удзел каманды з Баранавіч і Клецка, а таксама мінулагодні чэмпіён Ганцавіцкага раёна

1 і 3 мая адбыліся паўфінальныя сустрэчы.

“Будаўнік — ПМК-14” праводзіў матч у Баранавічах. Гэтая гульня прайшла у даволі роўнай барацьбе. У першым тайме сапернікі абмяняліся галамі. На 5-й хвіліне нападаючы гаспадароў Сяргей Грыц адкрыў лік, а праз некалькі хвілін цэнтральны паўабаронца ганцаўчан Аляксандр Харлаогійн аднавіў раўнавагу.

Больш інтрыгуючай і непрадказальнай аказалася другая палова матча. Мяркуйце самі. На 57-й хвіліне нападаючы Аляксандр Ходар вывеў ганцаўчан наперад — 2:1. За дзве мінуты да заканчэння асноўнага часу гульні баранавіцкі нападаючы Аляксей Ахрэмка зноў зрабіў лік нічыйным — 2:2. Здавалася, для выяўлення пераможцы спатрэбіцца серыя пасляматчавых пенальці. Аднак на апошняй хвіліне асноўнага часу нападаючы “Будаўніка” Аляксандр Ходар афармляе дубль і ставіць канчатковую кропку. 3:2 — нялёгкі выйгрыш ганцаўчан.

У другім паўфінальным матчы футбалісты з аграгарадка Хатынічы гулялі ў Клецку. Моцная каманда гаспадароў, забіўшы па два галы ў кожным тайме, не пакінула ніякіх шанцаў гасцям.

9 мая на стадыёне Ганцавіцкай СДЮШАР адбудуцца рашаючыя матчы. Трэцяе прызавое месца будуць аспрэчваць каманды Хатыніч і Баранавіч. Пачатак гульні ў 15 гадзін.

Безумоўна, вялікую цікавасць у балельшчыкаў выклікае фінал. За перамогу ў турніры пазмагаюцца “Будаўнік — ПМК-14” і каманда з Клецка. Матч пачнецца ў 17 гадзін.

Па выніках турніру пераможцы і прызёры будуць узнагароджаны кубкам і медалямі аддзела адукацыі, спорту і турызму райвыканкама.

Міхась АРЭШКА.