З АПЕРАТЫЎНЫХ ЗВОДАК ТЫДНЯ: крадзеж саджанцаў на 17 мільёнаў , драўніны на 169 мільёнаў рублёў і іншыя здарэнні

Укралі саджанцы

22 красавіка паступіла паведамленне старшыні фермерскай гаспадаркі “Сіняя птушка”, якая размяшчаецца на 1 кіламетры аўтадарогі Ганцавічы — Боркі, аб тым, што невядомая асоба ўкрала з тэрыторыі прадпрыемства 523 саджанцы буякоў, на агульную суму 17 мільёнаў 655 тысяч рублёў.

Непаўналетні злодзей

У гэтую ж сераду, 22 красавіка, у Ганцавіцкі РАУС патэлефанавала жыхарка Ганцавіч. Жанчына паведаміла, што ў яе з дома ўкралі грошы. Следчая група, якая прыехала на месца здарэння, выявіла, што грошы ўкраў

непаўналетні, ураджэнец вёскі Навасёлкі, навучэнец ДУА “Ганцавіцкі прафесійны ліцэй сельскагаспадарчай вытворчасці”. Падлетак знайшоў схаваны гаспадыняй ключ ад хаты, пранік у памяшканне і шляхам вольнага доступу ўкраў грошы ў суме 1 мільён 100 тысяч рублёў.

Прапаў чалавек

23 красавіка ўзбуджана крымінальная справа па факце знікнення Вадзіма Леанідавіча Рулінскага, 1988 года нараджэння, ураджэнца горада Ганцавічы, зарэгістраванага па адрасе: вуліца Будаўнікоў, д. 17, кв. 20. Мужчына 19 снежня 2014 года пайшоў з сацыяльнага цэнтра сацыяльнай адаптацыі “Горад надзеі”, размешчанага ў горадзе Апрэлеўка Маскоўскай вобласці, дзе знаходзіўся на сезонных работах, у невядомым напрамку. Да цяперашняга часу месцазнаходжанне Вадзіма Рулінскага невядома.

І зноў пра кашалькі…

У пятніцу, 24 красавіка, была ўзбуджана крымінальная справа па заяве загадчыцы бібліятэкі ў вёсцы Люсіна. Жанчына расказала супрацоўнікам міліцыі, што невядомая асоба ўкрала ў яе кашалёк, які яна паклала на прылавак у магазіне “Хлебасолле” ў Ганцавічах. Агульная матэрыяльная шкода, нанесеная пацярпеўшай, склала 2 мільёны 600 тысяч рублёў.

Дзяржаўная маёмасць

Ганцавіцкім РАСК па заяве дырэктара Ганцавіцкага лясгаса ад 16 лютага 2015 года ўзбуджана крымінальная справа ў адносінах невядомага, які 29 студзеня ў раёне квартала № 89, што адносіцца да другой групы лясоў на тэрыторыі Круговіцкага лясніцтва, а таксама квартала № 17 незаконна ажыццявіў высечку сырарастучых дрэў сасны. Матэрыяльная шкода, нанесеная лясгасу, склала 940 базавых велічынь — 169 мільёнаў рублёў.

Самагоншчык

24 красавіка паступіў рапарт начальніка аддзялення аховы правапарадку і прафілактыкі Ганцавіцкага РАУС аб тым, што ім выяўлены факт захоўвання жыхаром вуліцы Пясочнай у горадзе Ганцавічы самагоннага апарата і 80 літраў брагі.

Праводзіцца праверка.

Зводку чытала Ксенія ЛУЦКО.