Скажам вайне — “Не!”

Сёння нават дашкольнікі разумеюць, што вайна нясе боль, страты, гора, слёзы, голад.

Вялікую работу праводзім па патрыятычным выхаванні і мы ў нашай дашкольнай установе, бо прыйдзе час, і сённяшнія дашкольнікі будуць вызначаць будучыню роднай Беларусі. І вельмі важна ўжо зараз звярнуць увагу на выхаванне ў падрастаючага пакалення пачуцця патрыятызму, выхаваць асобу з актыўнай жыццёвай пазіцыяй, у цэнтры якой будзе ўсведамленне ўласнай адказнасці за лёс Радзімы.

Любоў да Радзімы пачынаецца з любові да роднага краю, з ведання яго гісторыі, бо нельга зразумець цяперашняе і будучае, не ведаючы мінулага!

Мы ўдзячныя за шчаслівае сённяшняе жыццё і жыццё нашых аднавяскоўцаў, якія загінулі ў гады Вялікай Айчыннай вайны. Нашы выхаванцы аб гэтым ведаюць. На занятках падчас гутарак, па фотаздымках неаднаразова ў даступнай форме выхавальнікі знаёмілі дзяцей з ветэранамі Вялікай Айчыннай вайны в. Раздзялавічы. На жаль, ніхто з іх не дажыў да 70-годдзя Перамогі, але памяць аб іх жыве ў нашых сэрцах. Падчас правядзення работы (прагляду фотаальбомаў, відэафільмаў, вывучэння вершаў і песень на гэтую тэматыку, конкурсу дзіцячых малюнкаў “Вайне — не”) дзеці ўсведамляюць, што, дзякуючы адзінству многіх народаў, мужнасці салдат розных дзяржаў, свет быў выратаваны ад гібелі, народ Беларусі мужна змагаўся з ворагам.

У нашай рэспубліцы праводзяцца розныя акцыі, прысвечаныя знамянальнай даце. Мы вырашылі, што таксама прымем удзел у акцыі — можам высадзіць 70 кветак каля помнікаў. А на тэрыторыі аграгарадка Раздзялавічы — тры помнікі: “Ахвяры фашызму“, помнік лётчыку —Івану Васільевічу Новікаву, помнік аднавяскоўцам, якія не вярнуліся з поля бою.

Штогод нашы выхаванцы прымаюць удзел у мітынгу, прысвечаным Дню  Перамогі. Не выключэннем будзе і гэты год. Дзеці  прымуць удзел у святкаванні і ўскладуць кветкі .

У нас таксама наладжана работа з сельскай і школьнай бібліятэкамі, з якімі мы праводзім сумесна шмат мерапрыемстваў. Напрыклад, на гэтым тыдні нашых выхаванцаў запрасілі на патрыятычную гадзіну “Праз 70 гадоў пасля Перамогі”.

Вялікую ўвагу па патрыятычным выхаванні надаём супрацоўніцтву з бацькамі. У кожнай групе дзеці разам з бацькамі робяць паштоўкі сваімі рукамі, якія яны падораць удовам ці сваякам ветэранаў Вялікай Айчыннай вайны.

Падводзячы вынікі зробленай рабоце, мы прыйшлі да высновы: як хораша на свеце без вайны, як добра жыць на зямлі, радавацца цёплым веснавым дням, спакойна лажыцца спаць і ўставаць, каб вітаць новы шчаслівы дзень.

Таму ўсе дружна кажам вайне: “Не!”.

Раіса Рабцэвіч,

выхавальнік дашкольнай

 адукацыі ДУА “Яслі-сад

в. Раздзялавічы”.