Каб менш было няшчасных выпадкаў

Злёт юных інспектараў дарожнага руху, які прайшоў нядаўна на базе СШ № 2 г. Ганцавічы, — далёка не новае мерапрыемства, і накіраваны ў першую чаргу на прадухіленне дзіцячага дарожна-транспартнага траўматызму, а таму ўсе яго этапы дапамагаюць дзецям даведацца і запомніць правілы паводзін на дарогах.

Усяго ў злёце юных інспектараў дарожнага руху прынялі ўдзел 14 атрадаў з 14 устаноў адукацыі раёна. Кожны атрад складаўся з васьмі чалавек, а гэта значыць, што ўсяго дзяцей-удзельнікаў было 112.

Злёт праходзіў у пяць конкурсных этапаў. Першы этап заключаўся ў тым, што кожны з удзельнікаў павінен быў адказаць на 10 пытанняў, звязаных з правіламі дарожнага руху. Другі этап патрабаваў ад удзельнікаў пераадолення трасы з элементаў фігурнага кіравання веласіпедам. На трэцім этапе навучэнцы школ раёна дэманстравалі свае навыкі ў аказанні першай дапамогі пацярпелым. Былі таксама і два творчыя этапы. Падчас першага з іх кожная каманда прадстаўляла адзіную праграму, якая прапагандуе захаванне ПДР, бяспечныя паводзіны на дарозе і дзейнасць атрадаў юных інспектараў дарожнага руху. А на другім творчым этапе кожная з каманд-удзельніц прадэманстравала ўласны ролік аб дзейнасці атрада юных інспектараў руху і новых формах работы па прапагандзе ПДР.

Несумненна, усе каманды выступілі годна і паказалі, што напрацаваныя імі матэрыялы можна выкарыстоўваць для таго, каб расказаць іх аднагодкам аб паводзінах на дарогах. Аднак месцы размеркаваліся наступным чынам: першае месца — за камандай Любашаўскай базавай школы; другое заняла каманда гімназіі г. Ганцавічы; трэцяе месца — сярэдняя школа № 3 г. Ганцавічы.

Усе ўдзельнікі і прызёры ўзнагароджаны каштоўнымі прызамі, набытымі дзякуючы ўдзелу ў мерапрыемстве многіх з індывідуальных прадпрымальнікаў нашага раёна. А таму арганізатары злёту: аддзел адукацыі, спорту і турызму і аддзел унутраных спраў Ганцавіцкага раённага выканаўчага камітэта, выказваюць падзяку Валерыю Міхейкіну, Аляксандру Семечку, Галіне Чумаковай, Мікалаю Лойку, Леаніду Купрыяновічу, раённай арганізацыі Таварыства Чырвонага Крыжа і асабіста яго старшыні Ганне Смоліч, а таксама ДУА “Ганцавіцкая сярэдняя школа № 2” і асабіста яе дырэктару Дзмітрыю Махцею за арганізацыю мерапрыемства.

Безумоўна, падобныя мерапрыемствы, спрыяюць прадухіленню няшчасцяў, якія могуць адбыцца з дзецьмі з-за няведання ПДР. Але, нягледзячы на гэта, кожны з бацькоў павінен самастойна дапамагчы свайму дзіцяці разабрацца ў тым, як трэба сябе паводзіць на дарозе, і тады няшчасных выпадкаў, несумненна, стане ў шмат разоў менш.

Аляксандра ГУРМАН.

НА ЗДЫМКАХ: уверсе — падчас другога этапа злёту; унізе — урачыстая лінейка перад пачаткам злёту.

Фота Ксеніі ЛУЦКО.