У гонар пераможцаў

Мэтамі мерапрыемства, па словах начальніка Ганцавіцкага РАУС Аляксея Яроменкі, стала патрыятычнае выхаванне моладзі, павышэнне ўзроўню спартыўнага майстэрства юнакоў, папулярызацыя і развіццё гіравога спорту на Ганцаўшчыне, а таксама прапаганда здаровага ладу жыцця сярод маладога пакалення. Спецыяльнымі гасцямі мерапрыемства сталі ветэраны вайны, якія жывуць у нашым горадзе: Сцяпан Іванавіч Васілаў, Іосіф Ігнатавіч Курловіч, Аляксей Якаўлевіч Сямашка і Уладзімір Лук’янавіч Гнацюк, якіх да месца правядзення чэмпіянату прывезлі супрацоўнікі РАУС. Яны, сведкі вайны, гонар нашага горада, з ахвотай наведалі гарадскі Дом культуры ў гэты дзень.

Пачалося мерапрыемства з кароткага інструктажу ўдзельнікаў чэмпіянату, пасля чаго маладыя спартсмены паказалі свае выступленні, якія праходзілі паэтапна, у трох вагавых катэгорыях: да 70 кілаграмаў, да 90 кілаграмаў і звыш 90 кілаграмаў. Атмасфера спартыўнага духу, здаровай канкурэнцыі і волі да перамогі панавала ў той дзень. Пад апладысменты прысутных удзельнікі чэмпіянату зноў і зноў паднімалі гіры, стараючыся кожным рыўком вырвацца наперад, абыйсці саперніка. Афіцыйнасць і сур’ёзнасць мерапрыемства “разбавілі” песні і музычнае суправаджэнне ўдзельнікаў мастацкай самадзейнасці  гарадскога Дома культуры.

Пасля падвядзення вынікаў спаборніцтва пераможцы і прызёры былі ўзнагароджаны кубкамі, медалямі і граматамі арганізатараў чэмпіянату. Так, у вагавай катэгорыі да 70 кілаграмаў першае месца заняў Сяргей Мініч (клуб спартыўна-баявых адзінаборстваў “Мядзведзь”), другое — Аляксандр Дзенісеня (клуб спартыўна-баявых адзінаборстваў “Мядзведзь”), трэцяе — на рахунку Сяргея Блінкоўскага (ДУА “Ганцавіцкі прафесійны ліцэй сельскагаспадарчай вытворчасці”). У катэгорыі да 90 кілаграмаў лепшым стаў Фарыд Сенюковіч (клуб спартыўна-баявых адзінаборстваў “Мядзведзь”), другое месца заняў Уладзімір Пашкевіч (ДУА “Ганцавіцкі прафесійны ліцэй сельскагаспадарчай вытворчасці”), трэцяе — Аляксандр Данільчанка (клуб спартыўна-баявых адзінаборстваў “Мядзведзь”). Лепшым сярод удзельнікаў у вагавай катэгорыі звыш 90 кілаграмаў быў прызнаны Аляксандр Ленкавец (Ганцавіцкі РАНС), другое месца на рахунку Сяргея Сідарэвіча (Ганцавіцкі РАУС), трэцяе дасталося Алегу Грыбоўскаму (Ганцавіцкі РАНС).

У агульнакамандным заліку першае месца заваявала каманда клуба спартыўна-баявых адзінаборстваў “Мядзведзь”, другое — Ганцавіцкага РАНС, трэцяе — ДУА “Ганцавіцкі прафесійны ліцэй сельскагаспадарчай вытворчасці”.

Напрыканцы мерапрыемства арганізатары сфатаграфаваліся з ветэранамі, у гонар і славу якіх і быў арганізаваны чэмпіянат, як сімвал памяці аб іх перамозе ў барацьбе з нямецка-фашысцкімі захопнікамі.

Ксенія ЛУЦКО.