Пачні з сябе!

На Ганцаўшчыне найбольш актыўна ў дабрачыннай акцыі пад назвай “Бязвыплатнае донарства пачынаецца з мяне!” прымаюць удзел работнікі медыцынскіх устаноў і станцыі пералівання крыві. Учора з самага ранку, яшчэ не было і 8 гадзін, у аддзяленні забору крыві раённай станцыі пералівання крыві было шматлюдна. Людзі, чыё прызванне — захоўваць здароўе і выратоўваць жыццё, разумеючы наколькі важны сам сэнс акцыі, па закліку душы прыйшлі, каб унесці свой уклад у агульную справу… Дарэчы, менавіта сярод супрацоўнікаў медустаноў раёна вельмі шмат донараў. Напрыклад, хірург-анколаг Марына Кузуёк, маючы рэдкую групу крыві, прынцыпова заўсёды здае яе бясплатна, больш за 110 кроваздач за многія гады зрабіла супрацоўніца станцыі пералівання крыві Ніна Збродава, уносяць свой уклад у выратаванне жыцця людзей і тэхнік гэтай установы Аляксандр Літвіновіч, санітарка Валянціна Купрыянік, медсястра Таццяна Дыдышка і многія іншыя.

Дарэчы, як расказала загадчыца аддзялення камплектацыі донарскіх кадраў станцыі пералівання крыві Таццяна Мацвеева, разам з медыкамі да акцыі далучаюцца і іншыя грамадзяне. Так, літаральна першым, хто адгукнуўся і бязвыплатна здаў кроў, стаў старшыня раённай арганізацыі РГА “Белая Русь” Віктар Супрун. “Даведаўшыся аб акцыі, адразу вырашыў прыняць у ёй удзел, — адзначыў Віктар Міхайлавіч. — Наша жыццё і дабрабыт, у рэшце рэшт, залежаць ад учынкаў кожнага з нас і, каб зрабіць гэты свет лепшым, не трэба многа. Варта толькі пачаць з сябе: несці дабро, адгукацца на чужы боль, дапамагаць па меры магчымасці іншым людзям…”.

Аляксей ГРУШЭВІЧ.

НА ЗДЫМКУ: донар — тэхнік станцыі пералівання крыві Аляксандр Літвіновіч, які прыняў удзел у акцыі, а таксама санітарка Валянціна Купрыянік і медсястра Іна Гарадзецкая.

Фота Алы ПЯТЛІЦКАЙ.