Каб пазбегнуць інфаркту і інсульту

Напрыклад, жанчына сярэдняга ўзросту ўжо даўно пакутуе ад павышанага артэрыяльнага ціску і галаўнога болю. Наведвае ўрачоў рэгулярна і, здаецца, што ўсё без сэнсу… Аднойчы забыла прыняць таблеткі (дарэчы, 3 дні назад таксама, як і тыдзень да гэтага) і жудасна разбалелася галава. Выклікала хуткую дапамогу. Медыкі прыехалі і дапамаглі. І так працягваецца не адзін год. У выніку такога несістэматычнага лячэння сасуды галаўнога мозгу не вытрымалі нагрузкі і ўсё закончылася інсультам, адсутнасцю магчымасці размаўляць і непрацуючай правай рукой.

А вось мужчына ў поўным росквіце сіл працуе на добрай і даволі адказнай пасадзе. І іншы раз у яго нешта шчыміць у грудзях, сціскае…. Жонка яго просіць: “Ідзі да ўрача!”, але куды там, работа, клопаты, ды яшчэ малады — якія ўрачы! А ў чарговы раз так сціснула… і “ляціць” машына хуткай дапамогі да новага пацыента, у якога інфаркт міякарда (добра, што паспелі). А потым у чалавека доўгі этап рэабілітацыі — тут не да работы, як бы паправіцца.

Такіх несуцяшальных гісторый, на жаль, вельмі многа. У нашым раёне толькі за першыя тры месяцы з пачатку года зафіксавана 5 інфарктаў міякарда і 22 інсульты. Даволі буйная лічба для невялікай Ганцаўшчыны. За гэтымі лічбамі стаяць рэальныя чалавечыя лёсы. І ў большасці выпадкаў рэкамендацыі ўрачоў хворымі не выконваліся. А, між тым, штодзённы сістэматычны прыём назначаных урачом прэпаратаў вельмі важны. Падбор прэпаратаў выконваецца, улічваючы індывідуальныя асаблівасці пацыента, кожную канкрэтную сітуацыю. Часта працэс лячэння вельмі працяглы, але і вынік гаворыць сам за сябе — значнае паляпшэнне самаадчування і звядзенне да мінімуму сасудзістых катастроф.

Трэба памятаць, што назначаныя ўрачом медыкаменты неабходна прымаць сістэматычна. Для таго, каб выявіць безсімптомныя захворванні ці ўдакладніць дыягназ, нельга ігнараваць наведванне паліклінікі і праходжанне штогадовых дыспансерных аглядаў.

Калі ў чалавека ці ў яго блізкіх ёсць праблемы са здароўем, варта задумацца — можа не трэба даводзіць сітуацыю да цяжкага фіналу. Неабходна клапаціцца аб сваім здароўі, а, значыць, наведваць урачоў і мэтанакіравана выконваць іх рэкамендацыі.

Ірына Комар, урач-кардыёлаг УАЗ “Ганцавіцкая ЦРБ”.