Незаконная зброя, махлярства, самагоншчыкі і іншыя здарэнні

Махлярскім шляхам

7 красавіка, у аўторак, ў аператыўны аддзел РАУС паступіла заява ад жыхара горада Ганцавічы Анатоля Ж. Мужчына паведаміў, што Аляксандр Р. махлярскім шляхам завалодаў яго грашовымі сродкамі.

Падрабязнасці справы зараз высвятляюцца.

Непрыемны факт

У гэты ж дзень паступіў рапарт участковага інспектара Ганцавіцкага РАУС аб тым, што ў гаспадарчай пабудове ў двары дома № 10 па вуліцы Першамайскай у вёсцы Лактышы, у Аляксандра М. выяўлены факт захоўвання самагоннага апарата.

Праверку па справе праводзіць РАУС.

Сабутыльнікі

У сераду, 8 красавіка, паступіла паведамленне ад Эдуарда Я., жыхара горада Ганцавічы. Мужчына заявіў, што 4 красавіка падчас распіцця спіртных напояў знаёмы Артур С. са сваім сябрам пабілі яго і з кішэні штаноў укралі грошы.

Не падзялілі…

8 красавіка жыхарка Ганцавіч паведаміла супрацоўнікам міліцыі, што яе муж забраў без дазволу тэлевізар, які жанчына набыла ў крэдыт.

Пакуль адсутнічала…

У чацвер, 9 красавіка, аператыўнікам паступіла паведамленне ад Веры В. з вёскі Боркі. Жанчына расказала, што вярнулася з бальніцы дадому і выявіла: у хаце і вакол яе невядомы распыліў газавы балончык.

Праверку праводзіць РАУС.

Незаконная зброя

У гэты ж дзень паступіў рапарт начальніка аддзялення аховы правапарадку і прафілактыкі РАУС аб тым, што ў ходзе санкцыянаванага агляду ў доме па вуліцы Савецкай у вёсцы Ліпск у грамадзяніна Мікалая Ш. было адабрана незарэгістраванае паляўнічае ружжо “ІЖ-27”, а таксама 10 паляўнічых патронаў. У дзеяннях Мікалая Ш. прадугледжваецца адміністрацыйнае правапарушэнне, класіфікуемае арт. 23.71 Кодэкса аб адміністрацыйных правапарушэннях Рэспублікі Беларусь. Па справе праводзіцца праверка.

Крымінальны крадзеж

10 красавіка ўзбуджана крымінальная справа ў адносінах невядомай асобы, якая ў перыяд часу з 28 сакавіка па 10 красавіка пранікла ў будынак былой школы ў вёсцы Задуб’е, адкуль украла тры электралічыльнікі, шэсць металічных навясных замкоў, 20 метраў двухжыльнага электракабелю, 22 падстольныя свяцільні, 14 люмінісцэнтных лямпаў, 23 аконныя шклы. Матэрыяльная шкода, нанесеная ў выніку крадзяжу, склала 5 мільёнаў 380 тысяч рублёў.

Будзьце пільнымі!

У пятніцу, 10 красавіка ў міліцыю звярнулася жыхарка горада Ганцавічы Тамара С. Жанчына паведаміла аператыўным супрацоўнікам, што ў магазіне “Свежы хлеб” у яе ўкралі з сумачкі кашалёк з грашыма ў суме 800000 рублёў.

Праверку праводзіць РАУС.

СВЯТЛАФОР ДАІ

За кіраванне транспартным сродкам у стане алкагольнага ап’янення затрыманы:

Алег Уладзіміравіч Блажэвіч, жыхар горада Ганцавічы. Кіраваў аўтамабілем “Фальксваген”.

Зводку чытала Ксенія ЛУЦКО.