Сябры з Бранска

Днямі на Ганцаўшчыну завітала дэлегацыя цэнтра дзіцячага і юнацкага турызму і экскурсій расійскага горада Бранска. Госці пазнаёміліся з гісторыяй нашага раёна, пабывалі на розных аб’ектах райцэнтра. Непадробная цікавасць да нашага краю, жаданне супрацоўнічаць і абменьвацца вопытам —асноўны лейтматыў вандроўкі расіян.

У свой час дырэктар раённага цэнтра дзіцяча-юнацкага турызму і экскурсій Ала Рылка пабывала ў Бранску, дзе праводзіўся семінар па абмене вопытам. Так завязалася знаёмства з расійскімі калегамі і па запрашэнні яны падчас тыднёвай паездкі па Беларусі завіталі да нас.

Як адзначыў дырэктар Бранскага цэнтра Барыс Бялоў, ім даводзілася шмат дзе бываць, у тым ліку і ў нашай краіне, але такі рэгіён як Ганцаўшчына яны адкрываюць для сябе ўпершыню. Як спецыяліста, яго, найперш, уразіла адладжаная сістэма адукацыі. “У вас працуюць цудоўныя спецыялісты, ёсць што пераняць і выкарыстаць у рабоце з дзецьмі і моладдзю, — заўважыў Барыс Уладзіміравіч. — А ўвогуле, уражвае чысціня і парадак, а таксама відаць сацыяльная накіраванасць ва ўсім. У многім вы наперадзе і шмат чаго вартае для пераймання”.

Госці пабывалі ў дапаможнай школе-інтэрнаце, наведалі раённы краязнаўчы музей, прайшліся па Алеі пісьменства, даведаліся аб дзейнасці кінатэатра “Маладосць” і раённай дзіцячай бібліятэкі і надоўга затрымаліся ў раённым цэнтры дзіцячай і юнацкай творчасці, дзе вопытныя педагогі расказалі аб сваёй рабоце, а іх выхаванцы сваёй творчасцю парадавалі гасцей. Шмат станоўчых эмоцый у гасцей пакінула і наведванне Ганцавіцкага хлебазавода.

Разам з прафесійнай цікавасцю госці даволі падрабязна распытвалі пра эканамічнае становішча і цэны. Праводзячы паралелі, здзіўляліся даступнасці тавараў і паслуг. Іншы раз выклікала ўсмешку непадробнае здзіўленне гасцей. Напрыклад, яны некалькі разоў перапытвалі: няўжо ў горадзе такая чысціня заўсёды — можа яго спецыяльна прыбралі да прыезду дэлегацыі? Мы ўжо так прывыклі да навядзення парадку, што для нас гэта стала нормай, людзі ж глядзяць свежым вокам і адразу адзначаюць адметнасці нашага райцэнтра.

У размове Барыс Бялоў упэўнена падкрэсліў, што двухбаковае супрацоўніцтва паміж цэнтрам турызму Ганцаўшчыны і Браншчыны абавязкова атрымае працяг. “Дакладна плануем прывезці да вас не толькі дзетак, але і педагогаў для абмену вопытам, — сказаў Барыс Уладзіміравіч. — У вас цудоўны край і цудоўныя людзі. Аб’ездзіў усю Еўропу, але лепшай атмасферы, калі адчуваеш сябе нібы дома, больш як на Беларусі, я нідзе не сустракаў…”.

Аляксей Грушэвіч.