ДВА ПЕРАМОЖЦЫ Ў ФІНАЛЕ

У суботу, 4 красавіка, у гарадскім Доме культуры адбыўся фінал раённай лігі клуба вясёлых і знаходлівых паміж установамі адукацыі нашага раёна. У фінале прынялі ўдзел чатыры каманды — СШ № 3 “Тумблер”, Хатыніцкай СШ “Пешаходы”, Ганцавіцкага ліцэя сельскагаспадарчай вытворчасці “Тайм-аўт for кепiкi” і Люсінскага дзіцячага-сада — СШ “Ракі ў атацы”.

Уменне рабят весяліць людзей журы ацэньвала ў трох конкурсах: “Хатняе заданне”, “Біятлон” і “Стэм”. Ужо з першага конкурсу, пад назвай “Запіскі з апошняй парты”, каманды змаглі здзівіць і развесяліць не толькі гледачоў і журы, але і вядучага Яўгена Тамашэню. Так, у самым пачатку свайго выступлення каманда “Тумблер” паднесла Яўгену… батон белага хлеба! А каманда “Пешаходы” падарыла кветкі члену журы, метадысту метадычнага кабінета аддзела адукацыі, спорту і турызму райвыканкама Ганне Арэшка.

Падчас другога конкурсу, пад назвай “Хай кажуць”, журы наогул не змагло адразу вызначыцца, каму аддаць перамогу: ”Тумблеру” або “Тайм-аўт for кепiкi”, таму што жарты абедзвюх каманд прымушалі смяяцца ўсю залу. Аднак, адзін бал за перамогу ў конкурсе ўсё ж пайшоў да каманды “Тайм-аўт for кепiкi”.

Трэці конкурс насіў назву “Патэлефануй мне, патэлефануй…”, і першай на сцэну выйшла каманда “Тумблер”, якая адразу прыцягнула асаблівую ўвагу балельшчыкаў фіналу КВЗ. Фантазія на тэму ўзнікнення новай перадачы “Давай развядземся” набыла вялікую папулярнасць у гледачоў. Астатнія каманды таксама не падвялі, і фінал скончыўся вясёлым смехам і выдатным настроем ва ўсіх, хто прысутнічаў на ім.

Журы было вельмі складана выбраць пераможцу сярод такіх выдатных каманд, а таму ніхто не здзівіўся, што членам журы спатрэбілася шмат часу на абмеркаванне вынікаў. І, дарэчы, нельга не адзначыць, што нават гэты час прайшоў весела. Яўген Тамашэня з дапамогай члена журы і мастацкага кіраўніка ГДК Станіслава Локтыша, а таксама каманд-фіналістак весяліў гледачоў.

Нарэшце члены журы ўсё ж зрабілі свой няпросты выбар, і па выніках усёй гульні прызавыя месцы былі размеркаваны наступным чынам.

Трэцяе месца заняла каманда “Пешаходы” з агульнай сумай балаў 9,4.

Другое месца атрымала каманда “Тайм-аўт for кепікі” з вынікам у 10 балаў.

Першае месца з аднолькавай сумай балаў за ўсю гульню (11,2) занялі каманды “Тумблер” і “Ракі ў атацы”.

Аднак гэта яшчэ не ўсё.

У намінацыі “Лепшы жарт” перамагла каманда “Тайм-аўт for кепікі”, у намінацыі “Лепшая КВЗшніца” — Марыя Сяргейчык, член каманды “Тумблер”, а ў намінацыі “Лепшы КВЗшнік” пераможцай стаў Арцём Жалезны з каманды “Ракі ў атацы”.

Пераможцы і прызёры ўзнагароджаны граматамі аддзела адукацыі, спорту і турызму Ганцавіцкага райвыканкама, падарункамі і прызамі Ганцавіцкай раённай арганізацыі “БРСМ”, раённай грамадскай арганізацыі “Белая Русь” і гарадскога Дома культуры.

Атрымаў прыз і яшчэ адзін удзельнік. Спецыяльным прызам аддзела ідэалагічнай работы, культуры і па справах моладзі райвыканкама ўзнагароджаны Яўген Занька з “Тумблера”, які на працягу ўсяго сезона не пераставаў радаваць журы і гледачоў.

Аляксандра ГУРМАН.