Аб медабслугоўванні і дарогах

Старшыня Нацкага сельвыканкама Ларыса Мышкавец адзначыла, што ў Мельніках налічваецца 95 жыхароў, з іх 60 — пенсіянеры. У Гуце наогул з 44 чалавек 32 знаходзяцца на заслужаным адпачынку. Зразумела, што ў адносінах да іх неабходна праяўляць асаблівую ўвагу і пастаянны клопат, вырашаць узнікаючыя праблемы і пытанні. Аб гэтым ішла размова на сходах па месцы жыхарства, якія адбыліся тут у мінулую пятніцу.

Заўважым, што ў Мельніках сустрэча з прадстаўнікамі райвыканкама і раённых службаў праходзіла ля вясковага магазіна. Акрамя гэтага гандлёвага будынка, жыхарам больш няма дзе сабрацца.

Людзі, якія прыйшлі на сход, гаварылі аб набалелым, аб тым, што трывожыць. Пенсіянерка Галіна Занька ўзняла, бадай, самую вострую праблему, якая датычыцца ўсіх жыхароў вёскі:

— Раней да нас пастаянна прыязджаў урач. Ён вёў прыём у Доме сацыяльна-культурных паслуг. Пасля яго закрыцця ўсё скончылася. Праўда, па неадкладным выкліку машына хуткай медыцынскай дапамогі прыязджае. Аднак гэта не выйсце са становішча.

Усім зразумела, што зімой у Доме сацыяльна-культурных паслуг, які не ацяпляецца, холадна. Ці можна зараз, калі пацяплела, выдзеліць тут пакой для медыцынскага абслугоўвання?

Загадчык аддзялення прафілактыкі цэнтральнай раённай бальніцы Васіль Несцяровіч паабяцаў, што перадасць гэтую просьбу галоўнаму ўрачу для яе выканання.

На сёлетні год запланаваны рамонт участка дарогі Мельнікі — Лактышы. Жыхары пацікавіліся, калі ён пачнецца. Адказ галоўнага інжынера Ганцавіцкага ДРБУ № 100 Паўла Бурмакі быў не надта абнадзейваючым. Праект ёсць, аднак фінансаванне пакуль прыпынена. Магчыма, восенню гравійнае пакрыццё ўсё ж адрамантуюць.

Да прадстаўніка дарожнай службы асабіста звярнулася Ніна Супрун. На вуліцы Лясная, ля дома, дзе жыве жанчына, утварыліся дзве вялікія ямы. Нават машына хуткай медыцынскай дапамогі пры неабходнасці не можа сюды пад’ехаць. Павел Бурмака запэўніў, што праезная частка будзе выраўнена.

Жыхары Мельнікоў закранулі таксама пытанні вулічнага асвятлення, вывазу бытавога смецця, навядзення парадку на могілках.

У адрозненне ад гэтай вёскі, у Гуце Дом сацыяльна-культурных паслуг дзейнічае. Сюды і прыйшлі на сход мясцовыя жыхары, у асноўным, жанчыны. Яны з радасцю даведаліся, што ў хуткім часе пачнецца рамонт вуліцы Савецкай, якая з’яўляецца цэнтральнай.

Вера Корань, Вольга Лыганоўская, Марыя Ціхан і Любоў Вярбіцкая задаволены работай вясковага магазіна. Прадавец Таццяна Юрчык абслугоўвае ветліва і тактоўна, клапоціцца аб пенсіянерах.

Жыхары Гуты, як, дарэчы, і Мельнікоў, папрасілі прывезці ў магазін вапну для пабелкі дрэў. У бліжэйшыя дні гэта будзе зроблена.

У абодвух сходах прыняў удзел намеснік старшыні райвыканкама Уладзімір Рапейка. Ён падкрэсліў, што надзённыя пытанні, узнятыя жыхарамі, будуць вырашаны. Праяўляць клопат аб пенсіянерах, задавальняць іх патрэбы — адзін з галоўных абавязкаў мясцовай улады. У сваю чаргу, Уладзімір Адамавіч заклікаў усіх навесці чысціню і парадак на падворках і прылягаючай тэрыторыі, падзякаваў за актыўную жыццёвую пазіцыю.

Міхась АРЭШКА.