Ліцэісты ў ліку лепшых

Наталля Сахарчук расказала падлеткам пра тое, як варта сябе паводзіць на дарогах. Гаварыла яна аб правільным кіраванні і абсталяванні веласіпедаў, пра кіраванне мапедамі, скутарамі, матацыкламі і аўтамабілямі. Таксама Наталля Міхайлаўна адзначыла, што выкананне ПДР — залог будучага кожнага з нас.

Аднак, размова з навучэнцамі ліцэя пра правілы дарожнага руху — не адзіная і не першачарговая задача, з якой госці з Брэста наведалі навучальную ўстанову. Справа ў тым, што з 10 лістапада па 20 снежня мінулага года абласная Дзяржаўтаінспекцыя праводзіла дзіцячы творчы конкурс “Бяспечныя дарогі дзяцінства”. Галоўнай задачай конкурсу было далучэнне навучэнцаў да вывучэння і выканання правілаў дарожнага руху, прыцягненне ўвагі грамадскасці да пытанняў прафілактыкі дзіцячага дарожна-транспартнага траўматызму, а таксама выяўленне і падтрымка таленавітых навучэнцаў.

У рамках конкурсу дзецям ва ўзросце ад 6 да 16 гадоў было прапанавана зрабіць тэматычны макет па бяспецы дарожнага руху. Двое навучэнцаў групы № 1 Ганцавіцкага ліцэя сельскагаспадарчай вытворчасці — Ілья Наумік і Аляксей Мелехавец — сталі пераможцамі гэтага конкурсу. Яны пад кіраўніцтвам выкладчыка спецыяльнага кампанента Аляксандра Рабцэвіча збудавалі наглядны дапаможнік па ПДР, які атрымаў вельмі высокую ацэнку ў арганізатараў конкурсу. Маладыя людзі ўзнагароджаны дыпломамі і каштоўнымі прызамі.

Наогул, у канферэнц-зале ліцэя панавала прыемная сяброўская атмасфера. Навучэнцы з увагай слухалі Наталлю Міхайлаўну, задавалі пытанні, а таксама шчыра радаваліся за таварышаў.

Аляксандра Гурман.

НА ЗДЫМКУ: пераможца конкурсу “Бяспечныя дарогі дзяцінства” Ілья Наумік з дыпломам і каштоўным прызам.

Фота аўтара.