Каманда “КПД” — пераможца

У нядзелю, 22 сакавіка, завяршыўся чарговы кубак раёна па міні-футболе. Як і ў мінулым годзе, перамогу ў турніры

У суботу адбыліся гульні 1/4 фіналу. У першым чвэрцьфінале футбалісты “КПД” упэўнена перамаглі каманду “Арбіта” (Азярэчча) з лікам 6:2. А вось астатнія чвэрцьфінальныя гульні выдаліся больш цікавымі і непрадказальнымі.

Каманда “Хатынічы”, добра згуляўшы ў абароне, перамагла “Бальшавік” з Малькавіч з лікам 4:3. На працягу ўсёй сустрэчы футбалісты “Бальшавіка” валодалі перавагай, аднак удача ў гэты дзень была на баку каманды “Хатынічы”.

У трэцім чвэрцьфінале паміж сабой сустрэліся каманды “ДЮСШ-1” і “ПМС”. Асноўны час гульні завяршыўся ўнічыю — 4:4. У дадатковыя дзесяць хвілін каманды забілі яшчэ па адным голе ў вароты адзін аднаго, а вось у серыі пенальці мацней аказаліся футбалісты “ПМС”, якія перамаглі з лікам 2:0.

Апошняя гульня 1/4 фіналу паміж камандамі “Камунальнік” і “Будаўнік — ПМК-14” таксама атрымалася вельмі цікавай і завяршылася даволі нечакана. “Будаўнікі” хоць і гулялі не ў самым аптымальным складзе, на працягу ўсёй гульні валодалі перавагай, мелі шмат выдатных  момантаў для ўзяцця варот, якія абараняў Сяргей Рабцэвіч, але ўсё ж прайгралі з лікам 1:4.

У першым паўфінале каманда “КПД” упэўнена пераіграла футбалістаў з Хатыніч з лікам 8:1, а ў другім “Камунальнік” аказаўся мацней за “ПМС” — 4:1.

Такім чынам, у матчы за трэцяе месца сустрэліся каманды “Хатынічы” і “ПМС”. Гульня была абсалютна роўная і цяжка было аддаць перавагу камусьці з сапернікаў. Асноўны і дадатковы час сустрэчы завяршыліся ўнічыю, а ў серыі пенальці больш пашанцавала рабятам з “Хатыніч”, якія і занялі трэцяе месца.

У фінале таксама атрымалася напружаная барацьба. “Камунальнік” на працягу ўсёй сустрэчы аказваў “КПД” сур’ёзнае супраціўленне, але ўсё ж саступіў больш моцнаму саперніку. Канчатковы вынік сустрэчы — 4:2 на карысць каманды “КПД”.

Пасля фінальнага матча адбылася цырымонія ўзнагароджвання. Усе прызёры спаборніцтваў атрымалі медалі, а каманда-пераможца яшчэ і галоўны прыз турніру — кубак. Узнагароджаны і лепшыя ігракі фіналу і матча за трэцяе месца. Імі сталі Уладзімір Сукач (“КПД”), Сяргей Рабцэвіч (“Камунальнік”), Руслан Кісялевіч (“Хатынічы”), Антон Жукоўскі (“ПМС”). Прызы “За волю да перамогі” атрымалі Іван Занька (“ПМС”) і Віктар Лойка (“Камунальнік”).

Уладзімір САКАЛОЎ.

НА ЗДЫМКУ: каманда “КПД” — уладальнік кубка раёна па міні-футболе.

Фота Івана ЗАНЬКІ.