“Пажар” у кацельні

Прайшлі чарговыя камандна-штабныя вучэнні па абароне насельніцтва ад надзвычайных сітуацый. На гэты раз адпрацоўвалася задача — узгаранне на тэрыторыі цэнтральнай кацельні райцэнтра. У ходзе правядзення рамонтных работ з прымяненнем адкрытага агню адбылося ўзгаранне драўлянай дранкі ў прыбудове будынка кацельні. У памяшканні знаходзіліся 5 чалавек. Плошча пажару да моманту прыбыцця першых падраздзяленняў МНС складала 104 квадратныя метры.

Пачаліся вучэнні з таго, што аператар кацельні паведаміў аб пажары ў цэнтр аператыўнага ўпраўлення РАНС і назваў адрас аб’екта ўзгарання. Дыспетчар, у сваю чаргу, накіраваў да месца выкліку пажарных аварыйна-выратавальнай часці № 1 (г. Ганцавічы) і пажарных аварыйна-выратавальнага паста № 13 (в. В. Круговічы), № 12 (в. Люсіна), а таксама аварыйныя службы РЭС, гаргазу і хуткую дапамогу.

Службы прыбылі аператыўна, літаральна на працягу дзесяці хвілін усе былі на месцах. Усе дзейнічалі зладжана. Быў арганізаваны штаб, які кантраляваў усё, што адбываецца. Члены каманды ПАВЧ № 1 адразу пачалі тушыць узгаранне. Аварыйная брыгада гаргазу адключыла падачу газу ў кацельню. Брыгада медыкаў адпрацоўвала навыкі па аказанні першай медыцынскай дапамогі пацярпелым ад пажару. Старшы аварыйнай брыгады раённых электрасетак далажыў аб прыбыцці, удакладніў абстаноўку і аддаў каманду работнікам РЭС на выкананне работ па адключэнні электраэнергіі.

Несумненна, што ўсе службы выдатна справіліся з пастаўленай задачай. А гэта значыць, што ў выпадку ўзнікнення надзвычайнай сітуацыі ў горадзе ці ў раёне іх дзеянні будуць настолькі ж зладжанымі і прафесійнымі і дапамогуць ў выратаванні жыццяў.

Аляксандра ГУРМАН.