З АПЕРАТЫЎНЫХ ЗВОДАК ТЫДНЯ: фальшывыя грошы, «сабачыя» справы, самагубства і іншыя здарэнні

Фальшывыя грошы?

10 лютага паступіў рапарт супрацоўніка РАУС аб тым, што грамадзянка Л. у касе № 3 філіяла ААТ АСБ “Беларусбанк” у Ганцавічах прад’явіла для абмену грашовую купюру ў 100 долараў ЗША з прыкметамі падробкі.

Падобны выпадак адбыўся і 13 лютага. На гэты раз супрацоўнік магазіна “Палессе”, што ў горадзе Ганцавічы, заўважыў у пакупніка, які разлічваўся на касе за пакупкі, несапраўдную купюру.

Абставіны спраў высвятляе РАУС.

“Сабачыя” справы

Два выпадкі звароту грамадзян у міліцыю на мінулым тыдні былі звязаны з нападзеннем сабак. Так, 10 лютага Таццяна З., жыхарка горада, паведаміла аператыўнікам, што суседскі сабака задушыў яе курэй. А днём раней другі сабака кінуўся на маці Сяргея Б., аб чым мужчына паведаміў супрацоўнікам РАУС.

Смяротны зыход

Трагічны выпадак адбыўся 12 лютага ў доме № 41 па вуліцы Раздзялавіцкай у вёсцы Хатынічы. Там быў знойдзены труп Юрыя В., 1958 года нараджэння, які скончыў жыццё самагубствам праз павешанне. Аб гэтым міліцыянерам паведаміла суседка нябожчыка.

Выпаў з акна

14 лютага ў аператыўны аддзел РАУС паступіла паведамленне аб тым, што з другога паверха дома № 5 па вуліцы Будаўнікоў у горадзе Ганцавічы выпаў мужчына, якога потым аднеслі ў кватэру № 7 гэтага ж дома.

Абставіны справы зараз высвятляюцца.

Уцякач

13 лютага, ноччу, паступіў рапарт старшага дзяржаўнага аўтаінспектара ДАІ Ганцавіцкага РАУС аб тым, што пры выездзе з двара дома па вуліцы Кастрычніцкай ім быў спынены аўтамабіль “Фальксваген-Гольф”, вадзіцель якога ўцёк у невядомым напрамку.

Буйны крадзеж

15 лютага старшым следчым Ганцавіцкага РАСК узбуджана крымінальная справа ў адносінах невядомай асобы, якая сарвала навясны замок з гаража, які належыць жыхару Ганцавіч, і ўкрала адтуль зварачны апарат і два наборы ключоў, чым нанесла пацярпеламу матэрыяльную шкоду на суму 5 мільёнаў 800 тысяч рублёў.

Зводку чытала Ксенія ЛУЦКО.