Водаправод — за чый кошт?

І вось зараз тэма падводу вады да домаўладанняў атрымала працяг. Абласным упраўленнем жыллёва-камунальнай гаспадаркі вывучаецца сітуацыя з рэалізацыяй праграмы “Чыстая вада” і з гэтай нагоды ў вёсцы быў праведзены сход. Праблему падводу вады да домаўладанняў узнялі жыхары аддаленых ад цэнтра вёскі вуліц: Зялёнай, Перамогі, Ганцавіцкай, Раздзялавіцкай і другой паловы вуліцы Пінскай. Зноў жа гэтае пытанне ўжо неаднаразова ўзнімалася, і людзям прапанавалася будаваць водаправод на парытэтнай аснове — 50 працэнтаў затрат бярэ на сябе дзяржава, 50 працэнтаў аплочваюць самі людзі. Такія ўмовы многіх не задавальняюць, бо размова ідзе аб значных фінансавых укладаннях, — трэба цягнуць водаправод па вёсцы яшчэ амаль 6 кіламетраў. Але ж там знаходзіцца 309 жылых дамоў, і калі разам уключыцца ў справу, то і сума ўзносу будзе прымальнай для ўсіх.

Сёлета быў зварот і да губернатара вобласці Анатоля Ліса з пытаннем пракладкі водаправода ў Хатынічах. Губернатар таксама акцэнтаваў увагу на тым, што яго будаўніцтва магчыма толькі з долевым удзелам саміх людзей.

Трэба зыходзіць з рэалій нашага жыцця — дзяржавай і так ужо ўкладзены вялікія сродкі ў будаўніцтва сістэмы водазабеспячэння ў Хатынічах і пракладка адводаў ад цэнтральнай магістралі з долевым удзелам жыхароў павінна ўспрымацца спакойна, калі людзі сапраўды зацікаўлены ў водаправодзе. Робіцца ж гэта не на год не на два, а назаўжды. Безумоўна, ёсць цана пытання. Але зноў жа, усё залежыць ад саміх жыхароў — чым больш іх будзе ўдзельнічаць у будаўніцтве водаправода, тым меншай будзе фінансавая нагрузка на кожную сям’ю. Дарэчы, так паступілі ў Хатынічах жыхары вуліцы Зарэчнай — стварылі кааператыў і падалі ўжо дакументы на складанне праектнай дакументацыі. Людзі думаюць не толькі аб сабе, але і аб сваіх дзецях, якія будуць карыстацца ўсімі выгодамі.

У Раздзялавічах адбыўся такі ж сход і там людзі, што жывуць па вуліцах Савецкай, Лясной і Свяціцкай з задавальненнем згадзіліся будаваць водаправод з долевым удзелам. Яны зацікаўлены ў хутчэйшым вырашэнні пытання і рэальна ставяцца да яго.

Аляксей ГРУШЭВІЧ.