Самалячэнне недапушчальнае!

Паводле даных Сусветнай арганізацыі аховы здароўя, ВРВІ і грып складаюць да 90 працэнтаў усіх выпадкаў інфекцыйных захворванняў. На зямлі практычна няма чалавека, які хаця б аднойчы ў жыцці не адчуў на сабе іх каварства. Гэтыя захворванні наносяць велізарную шкоду здароўю насельніцтва і эканоміцы краін. Асабліва часта яны паражаюць дзяцей: малышы да года хварэюць у тры разы часцей астатніх дзяцей дашкольнага ўзросту і ў пяць разоў часцей, чым дарослыя. Найбольш хварэюць таксама людзі пажылога ўзросту і тыя, хто пакутуе на цяжкія хранічныя захворванні.

Перыядычна паўтараючыся, грып і ВРЗ забіраюць з усяго нашага жыцця каля аднаго года. Чалавек праводзіць гэтыя месяцы ў разбітым стане, пакутуючы ад ліхаманкі, агульнай слабасці, галаўнога болю, атручвання арганізма ядавітымі віруснымі бялкамі. Грып і іншыя вострыя вірусныя рэспіраторныя захворванні, якія часта паўтараюцца, паступова падрываюць сардэчна-сасудзістую сістэму, скарачаючы на некалькі гадоў сярэднюю працягласць жыцця чалавека. Пры цяжкім працяканні грыпу могуць узнікнуць незваротныя паражэнні сардэчна-сасудзістай сістэмы, дыхальных органаў, цэнтральнай нервовай сістэмы, правакуючыя захворванні сэрца і сасудаў, пнеўманіі, трахеабранхіты, менінгаэнцэлафаліты і іншыя. Ад ускладненняў ад грыпу штогод на планеце паміраюць тысячы чалавек.

Сёння медыцына можа прапанаваць некалькі спосабаў прафілактыкі захворванняў на ВРВІ і грып. Гэта вакцынацыя, прыём імунамадуліруючых лекавых прэпаратаў і неспецыфічнае павышэнне ўстойлівасці арганізму да вірусаў.

Вакцына ад грыпу існуе ўжо больш чым 60 гадоў. Прышчэпка з’яўляецца найбольш надзейнай аховай пры магчымых эпідэміях гэтага захворвання. Дзякуючы масавай вакцынацыі насельніцтва ўдалося папярэдзіць захворваемасць на поліяміэліт, дыфтэрыю, адзёр. Згодна са статыстыкай, штогадовая вакцынацыя супраць сезоннага грыпу значна знізіла ўзровень захворваемасці і смяротнасці ва ўсіх узроставых групах.

Што датычыцца неспецыфічных метадаў прафілактыкі прастудных захворванняў і грыпу, дык асноўным з іх з’яўляецца здаровы лад жыцця. Калі вы займаецеся спортам, правільна харчуецеся, атрымліваючы ўсе неабходныя вітаміны і мінералы, праводзіце шмат часу на свежым паветры, тады ваш арганізм зможа даць надзейны адпор інфекцыі і справіцца з ёю, дазваляючы пазбегнуць ускладненняў. Не забывайце пра пастаянныя правілы гігіены, асабліва ў перыяд эпідэміі, такія як мыццё рук, вільготная ўборка і праветрыванне памяшкання. Пазбягайце вялікага зборышча людзей, замяніце 15-хвілінны праезд у грамадскім транспарце паўгадзіннай прагулкай.

Загартоўка — фізічныя практыкаванні, паветраныя ванны, вільготныя абціранні, абліванне рук і ног халоднай вадой, кантрасны душ — надзейна абароняць ад грыпу і ВРВІ.

Збалансаванае харчаванне — штодзённае спажыванне свежай агародніны і фруктаў, цыбулі і часнаку — таксама вельмі важнае. Апранацца трэба адпаведна з сезонам, надвор’ем, але не захутвацца, не хадзіць з голай галавой і ў лёгкім абутку.

Калі ж вы ўсё-такі захварэлі, неадкладна звяртайцеся да ўрача! Памятайце, самалячэнне пры грыпе недапушчальнае!..

Анастасія ШАПЯЛЕВІЧ, фельчар-валеолаг ДУ “Ганцавіцкі райЦГіЭ“.