З аператыўных зводак тыдня: чаму забіраюць дзяцей, як падманваюць народ і іншыя здарэнні

Забралі дзяцей

Трэцяга лютага а палове 12 ночы супрацоўнік Ганцавіцкага РАУС паведаміў у аператыўную часць аб тым, што падчас наведвання ім сем’яў, якія стаяць на ўліку і знаходзяцца ў сацыяльна небяспечным становішчы дзяржаўнай установы адукацыі “Агарэвіцкая сярэдняя школа”, выяўлены факт знаходжання грамадзянкі Б. і яе мужа ў нецвярозым стане. Разам з нядбайнымі бацькамі ў гэты час дома па вуліцы Горкага ў вёсцы Агарэвічы знаходзіліся і пяцёра іх непаўналетніх дзяцей, якіх супрацоўнікі РАУС забралі і змясцілі ў інтэрнат.

Незаконны заробак

5 лютага, у чацвер, паступіў рапарт старшага оперупаўнаважанага Ганцавіцкага РАУС аб тым, што грамадзянін Ігар Л., жыхар горада Ганцавічы, займаецца незаконнай прадпрымальніцкай дзейнасцю, якая звязана з атрыманнем даходу ў буйным памеры, без спецыяльнага дазволу (ліцэнзіі).

Праверку па справе праводзіць РАУС.

Махлярствы працягваюцца

У гэты ж дзень паступіла заява грамадзянкі Ларысы Я., жыхаркі дома па вуліцы Заводскай горада Ганцавічы. Жанчына паведаміла, што невядомая асоба прадала яе свекрыві Ніне Я. плед па неапраўдана высокай цане — 2 мільёны 900 тысяч рублёў, і папрасіла супрацоўнікаў РАУС разабрацца ў дадзенай сітуацыі.

Падрабязнасці справы высвятляюцца.

Крадзеж паліва

Яшчэ адна заява была зарэгістравана 5 лютага аператыўнымі работнікамі РАУС. Так, паступіла паведамленне ад дырэктара ПВУП “Палескі стандарт” аб тым, што з бака трактара, які знаходзіўся ў квартале № 75 Дзяніскавіцкага лясніцтва, было ўкрадзена 9 літраў дызельнага паліва.

Небяспечная госця

6 лютага жыхар вёскі Раздзялавічы Лявонцій К. паведаміў супрацоўнікам Ганцавіцкага РАУС аб тым, што грамадзянка Марыя Я., якая знаходзілася ў яго ў гасцях, украла грошы ў суме 360 тысяч рублёў.

Падрабязнасці справы высвятляюцца.

Браканьеры

У гэтую ж пятніцу, 6 лютага, а шостай гадзіне вечара паступіла паведамленне начальніка Ганцавіцкай міжраённай інспекцыі аховы жывёльнага і расліннага свету аб тым, што 4 лютага ў вёсцы Малькавічы быў спынены мікрааўтобус “Фальксваген”, у якім знайшлі адну тушу дзіка без дакументаў, якія пацвярджаюць законнасць яе перамяшчэння.

Калі сябар аказаўся раптам…

У суботу, 7 лютага, па матэрыялах Ганцавіцкага РАУС па заяве Людмілы С., жыхаркі вёскі Малькавічы, узбуджана крымінальная справа ў адносінах жыхара гэтай вёскі Аляксея Х., які, знаходзячыся ў п’яным стане, пасля сумеснага распіцця спіртных напіткаў, украў у Людмілы С. 300 тысяч рублёў і мабільны тэлефон, чым нанёс жанчыне матэрыяльную шкоду на суму 800 тысяч рублёў.

Зводку чытала Ксенія ЛУЦКО.