Прыбытак даражэй за бацькоўскія слёзы?

Так, 23 лістапада 2014 года днём у магазіне “Алімп” пракурор раёна стаў сведкам, як прадавец прадала непаўналетняй дзяўчынцы піва. За гэта правапарушальніца была прыцягнута да адміністрацыйнай адказнасці ў выглядзе штрафу памерам 25 базавых велічынь — на той час 3 мільёны 750 тысяч рублёў. Каб звярнуць увагу на гэтую праблему, у райспажыўтаварыстве пракуратурай раёна была праведзена нарада з удзелам усіх загадчыкаў магазінаў, аб’ектаў грамадскага харчавання гэтай арганізацыі і ўказана на недапушчальнасць парушэння заканадаўства.

Але не прайшло і месяца пасля нарады, як адбылося чарговае аналагічнае правапарушэнне з боку работніка райспажыўтаварыства, якое мела сур’ёзныя наступствы. А менавіта, 27 снежня 2014 года непаўналетні ў кафетэрыі вёскі Малькавічы спачатку ўзяў на “вексель” у прадаўца Іны Рылкі бутэльку піва, затым яшчэ бутэльку гарэлкі і закончыў “падаграваць” сябе зноў півам. Напіўся так, што амаль нічога не помніў. Закончылася папойка даволі змрочна — непаўналетні пабіў шкло ў вокнах адміністрацыйнага будынка, які належыць СВК “Бярозавец”, а затым зняў з чужога аўтамабіля відэарэгістратар. Адным словам, п’янка, учыненая “з дапамогай” работніцы кафетэрыя, абярнулася для хлопца  ў канчатковым выніку ўзбуджэннем дзвюх крымінальных спраў па фактах хуліганства і крадзяжу. Варта адзначыць нахабства і цынізм работніка кафетэрыя Іны Рылкі, якая да гэтага выпадку ўжо неаднаразова прадавала і давала ў доўг спіртное маладому правапарушальніку. Яго бацькі нязменна вярталі грошы і пастаянна прасілі больш не даваць іх сыну спіртное, але, як бачым, мясцовай “гаспадыні” кафетэрыя прыбытак быў даражэй за бацькоўскія слёзы. Адміністрацыйная камісія пры райвыканкаме вынесла рашэнне: пакараць Іну Рылку штрафам у 25 базавых велічынь — зараз 4 мільёны 500 тысяч рублёў. Таксама яна прыцягнута і да дысцыплінарнай адказнасці — ёй аб’яўлена вымова. Хаця пракуратура раёна не згодна з такой мерай пакарання. Як адзначыла памочнік пракурора раёна Дзіяна Якубец, жанчына шматразова парушала закон, рэалізуючы, ды яшчэ і ў доўг, спіртное непаўналетняму, хаця, між іншым, добра ведала, што яму няма 18 гадоў. Таму пакаранне не адпавядае сур’ёзнасці правапарушэння, якое пацягнула за сабой здзяйсненне злачынства. Зараз матэрыялы справы знаходзяцца на разглядзе ў пракуратуры раёна, пасля чаго можа быць прынята рашэнне аб больш жорсткім пакаранні — за згаданае правапарушэнне прадугледжваецца штраф да 50 базавых велічынь. Таксама варта будзе разгледзець і пытанне аб звальненні жанчыны з займаемай пасады.

Тое, што толькі прадаўцы райспажыўтаварыства трапілі ў спіс парушальнікаў, растлумачыць можна даволі проста. У адпаведнасці з Дэкрэтам № 1 Прэзідэнта Рэспублікі Беларусь, пры паўторным здзяйсненні згаданага правапарушэння, у гандлёвага прадпрыемства могуць адабраць ліцэнзію на продаж спіртнога ці нават, увогуле, паставіць пытанне аб яго ліквідацыі. Гэта добра ведаюць у прыватных магазінах і больш сур’ёзна адносяцца да магчымых наступстваў. У сваю чаргу,   цяжка ўявіць магчымым такі вынік  для райспажыўтаварыства.  Можа таму ў гэтай арганізацыі не надаюць асаблівай увагі ўзнятай у артыкуле праблеме?

Аляксей Грушэвіч.