З аператыўных зводак тыдня: серыя злачынстваў і іншыя здарэнні

Невядомы злодзей

26 студзеня па заяве жыхара вёскі Хатынічы, 1960 года нараджэння, Мікалая Я. у адносінах невядомай асобы была ўзбуджана крымінальная справа. Невядомы пранік у гаспадарчы будынак, размешчаны ў двары дома № 94 па вуліцы Люсінскай, і ўкраў адтуль веласіпед.

Ілжывыя дакументы

26 студзеня па матэрыялах Ганцавіцкага РАУС у адносінах Аляксандра К., жыхара і ўраджэнца вёскі Хатынічы, 1993 года нараджэння, раней не судзімага ўзбуджана крымінальная справа. Малады чылавек, знаходзячыся ў будынку Ганцавіцкага РАУС пры падрыхтоўцы адміністрацыйнага матэрыялу па факце здзейсненага ім правапарушэння, прад’явіў старшаму інспектару па адміністрацыйнай практыцы заведама лжывае вадзіцельскае пасведчанне і талон папярэджанняў на сваё імя.

Буйны крадзеж

27 студзеня па матэрыялах Ганцавіцкага РАУС узбуджана крымінальная справа ў адносінах невядомай асобы, якая з нежылога дома па вуліцы В. Харужай у вёсцы Ганцавічы ўкрала зварачны апарат, шрубавёрт, бутэльку каньяку, трохлітровы слоік самагонкі, 20 літраў дызельнага паліва, чым нанесла Аляксандру Р., галоўнаму механіку ААТ “Рыбгас “Лактышы”, матэрыяльную шкоду на суму каля 5 мільёнаў рублёў.

Серыя злачынстваў

Адразу некалькі аднатыпных злачынстваў было здзейснена невядомымі асобамі ў перыяд з 30 на 31 студзеня. Так, у суботу а 10 гадзіне раніцы жыхар горада Ганцавічы Уладзімір С. паведаміў аператыўнікам, што мінулай ноччу нехта адкрыў шкло і пашкодзіў правады замка запальвання ў яго аўтамашыне “ВАЗ-2101”, якая знаходзілася на стаянцы каля дома па вуліцы Чайкоўскага.

Праз 10 мінут Наталля К. расказала супрацоўнікам РАУС, што гэтай жа ноччу невядомы пашкодзіў замок запальвання ў аўтамашыне “Газель”, якая стаяла каля другога пад’езда дома № 40А па вуліцы Матросава.

А яшчэ праз некалькі хвілін жыхар дома № 47, што на вуліцы Матросава Васіль Р., паведаміў міліцыянерам аб спробе невядомай асобы завесці яго “Мэрсэдэс-Спрынтар”, які стаяў на стаянцы каля дома. Як і ў папярэдніх выпадках, у аўтамабілі быў пашкоджаны замок запальвання і ўзламаны дзверы.

Трыма гадзінамі пазней паступіла вусная заява жыхара вуліцы Матросава Юрыя М., які расказаў супрацоўнікам РАУС, што ў ноч з 30 на 31 студзеня невядомы ўкраў яго вадзіцельскае пасведчанне, якое знаходзілася ў прыпаркаванай ля дома аўтамашыне “Форд-Фіеста”.

СВЯТЛАФОР ДАІ

За кіраванне транспартным сродкам у стане алкагольнага ап’янення затрыманы:

Анатоль Уладзіміравіч Ярашэвіч, 1984 года нараджэння, жыхар вёскі Хатынічы. Кіраваў асабістым мотавеласіпедам.

Святлана Мікалаеўна Віннік, 1987 года нараджэння, жыхарка горада Ганцавічы. Кіравала асабістым аўтамабілем “Форд-Фокус”.

Зводку чытала Ксенія ЛУЦКО.