Пратэрмінаваныя прадукты

Найбольшая колькасць парушэнняў санітарна-эпідэміялагічнага заканадаўства прыпадае на рэалізацыю прадукцыі са скончаным тэрмінам прыгоднасці — 36,7 працэнта. Усяго летась санітарнай службай раёна знята з рэалізацыі 432 кілаграмы харчовай прадукцыі, прыпынена эксплуатацыя 25 аб’ектаў, у тым ліку і для правядзення пазачарговага санітарнага дня. Таксама накіравана суб’ектам гаспадарання 80 прадпісанняў (рэкамендацый) аб ухіленні выяўленых парушэнняў і адно хадайніцтва аб адпаведнасці займаемай пасадзе. Да адміністрацыйнай адказнасці прыцягнуты 42 службовыя і 16 юрыдычных асоб. Разам з гэтым яшчэ 29 чалавек прыцягнуты да дысцыплінарнай адказнасці.

Але, нягледзячы на жорсткія меры, якія прымаюцца да парушальнікаў заканадаўства, факты рэалізацыі прадуктаў харчавання са скончаным тэрмінам прыгоднасці застаюцца даволі распаўсюджанымі. Так, пры правядзенні праверак у студзені 2015 года выяўлены ўжо тры выпадкі спроб продажу нядабраякаснай прадукцыі ва ўніверсаме “Родны кут” і магазіне “Кулінарыя № 2” райспажыўтаварыства, а таксама ў магазіне “Амега” прыватнага прадпрыемства “Заньков”. Гэта ў першую чаргу сведчыць аб неналежным вытворчым кантролі з боку адміністрацый суб’ектаў гаспадарання.

Пры пакупцы прадуктаў харчавання раім звяртаць увагу на этыкетку, маркіровачны ярлык, дзе маецца неабходная інфармацыя аб тэрмінах прыгоднасці. Акрамя гэтага, варта праверыць цэласнасць і знешні выгляд упакоўкі, тэмпературу ў халадзільнай устаноўцы, дзе яна захоўваецца, а пры пакупцы нефасаванай прадукцыі сачыць за тым, як яна адпускаецца. Гэта павінна рабіцца з выкарыстаннем шчыпцоў, лапатак, ложак ці аднаразовых пальчатак.

Работа па кантролі за захоўваннем санітарных норм, правілаў і гігіенічных нарматываў будзе весціся пастаянна.

Дзмітрый ГАРАГЛЯД, галоўны санітарны ўрач раёна.