З АПЕРАТЫЎНЫХ ЗВОДАК ТЫДНЯ: насілле над студэнткай, страшная «знаходка» і іншыя здарэнні

Пабіў дзяўчыну

19 студзеня па матэрыялах Ганцавіцкага РАУС была ўзбуджана крымінальная справа ў адносінах Віталя В., 1995 года нараджэння, ураджэнца і

жыхара горада Ганцавічы, непрацуючага, несудзімага. П’яны малады чалавек, 1 студзеня а 5 гадзіне раніцы, на пешаходнай дарожцы паміж кафэ “Настальгія” і домам № 45 па вуліцы Кастрычніцкай, нанёс адзін удар кулаком у твар Анастасіі І., ураджэнцы горада Ганцавічы, студэнтцы адной са сталічных ВНУ. У выніку парушальнік прычыніў дзяўчыне цялесныя пашкоджанні.

Без віны вінаваты

У гэты ж дзень у аператыўны аддзел РАУС паступіла паведамленне Аляксея Р., жыхара вёскі Агарэвічы, аб тым, што да яго дамоў прыйшлі трое хлопцаў і пачалі яго біць за рыбалоўныя снасці, якіх ён не браў.

Праверку па справе праводзіць РАУС.

Буйны крадзеж

У аўторак, 20 студзеня, згодна з матэрыяламі Ганцавіцкага РАУС была ўзбуджана крымінальная справа ў адносінах Віктара К., ураджэнца і жыхара горада Ганцавічы, 1979 года нараджэння. Мужчына 19 студзеня, у п’яным стане, у доме № 9 па вуліцы Камсамольскай вёскі Агарэвічы, украў 3 мабільныя тэлефоны і прадукты харчавання на агульную суму больш за 2 мільёны рублёў.

Страшная “знаходка”

У гэты ж дзень Валерый В., жыхар вёскі Люсіна, паведаміў аператыўнікам аб тым, што ў меліярацыйным канале за вёскай Ганцавічы ён знайшоў труп мужчыны, жыхара згаданай вёскі. Па папярэдніх дадзеных у памерлага раптам спынілася сэрца.

Праводзіцца праверка.

Ні сораму, ні сумлення

21 студзеня была ўзбуджана крымінальная справа ў адносінах невядомай асобы, якая з дома пенсіянеркі З., жыхаркі вёскі Малькавічы, украла грошы ў суме 1 мільён 400 тысяч рублёў.

П’янства на рабоце

З 19 па 21 студзеня супрацоўнікамі РАУС былі зафіксаваны 3 выпадкі знаходжання грамадзян на рабочым месцы ў нецвярозым стане. На рэканструкцыі аб’екта “Дом рамёстваў” у горадзе Ганцавічы працавалі п’яныя будаўнікі. Аператар машыннага даення МТФ у вёсцы Вялікія Круговічы таксама знаходзілася “пад мухай”. Трэці выпадак датычыцца нецвярозага рабочага Ганцавіцкага КПД.

Самагоншчык

21 студзеня, а 12 гадзіне ночы, паступіў рапарт міліцыянера Ганцавіцкага РАУС, у якім паведамлялася аб факце захоўвання 1,5 літра самагонкі і самагоннага апарата ў доме па вуліцы Савецкай у вёсцы Малькавічы.

СВЯТЛАФОР ДАІ

За кіраванне транспартным сродкам у стане алкагольнага ап’янення затрыманы:

Іван Мікалаевіч Аскерка, 1988 года нараджэння, жыхар горада Ганцавічы. Кіраваў аўтамабілем “БМВ 525”.

Мікалай Васільевіч Сергіеня, 1951 года нараджэння, жыхар горада Ганцавічы. Кіраваў службовым аўтамабілем “УАЗ”.

Зводку чытала Ксенія ЛУЦКО.