З АПЕРАТЫЎНЫХ ЗВОДАК ТЫДНЯ: прапаў чалавек і іншыя здарэнні

Прапаў чалавек

12 студзеня па матэрыялах Ганцавіцкага РАУС была ўзбуджана крымінальная справа па факце прапажы грамадзянкі Святланы В., 1981 года нара-джэння, ураджэнкі вёскі Хатынічы, жыхаркі горада Ганцавічы. Жанчына паехала на сезонныя заробкі ў Расію 20 чэрвеня 2014 года, і да цяперашняга часу яе месцазнаходжанне невядома.

Нядбайная маці

У гэты ж дзень, 12 студзеня, па матэрыялах РАУС была ўзбуджана крымінальная справа па частцы 2 артыкула 174 КК РБ у адносінах Марыі Я., 1978 года нараджэння, жыхаркі вёскі Хатынічы. Жанчына, раней судзімая, згодна з рашэннем суда Ганцавіцкага раёна, абавязана была выплачваць аліменты на ўтрыманне сваіх непаўналетніх дзяцей. Але не змагла гэтага зрабіць, бо на работу так і не ўладкавалася, а на ўлік ва ўпраўленне па працы, занятасці і сацыяльнай абароне Ганцавіцкага раённага выканаўчага камітэта не стала. Судовыя выканаўцы неаднаразова рабілі папярэ-джанні жанчыне, на якія яна не рэагавала, і добраахвотна выплаціць грошы не пажадала. Такім чынам, яе запазычанасць па аліментах склала больш за 17 мільёнаў. Зараз гэтая сума будзе спаганяцца праз суд.

Злачынны “куш”

14 студзеня была ўзбуджана справа ў адносінах да невядомай асобы, якая шляхам узлому навяснога і ўразнога замкоў пранікла ў гараж № 54, што ў гаражным масіве па вуліцы Заводскай у горадзе Ганцавічы, залезла ў аўтамашыну “Фальксваген-Транспарцёр”, адкуль украла прамысловыя тавары (дзіцячае, мужчынскае і жаночае адзенне) і будаўнічыя інструменты (шрубавёрт, перфаратар, зараднае ўстройства для акумулятараў аўтамабіляў). Агульная матэрыяльная шкода склала амаль 60 мільёнаў рублёў.

Зноў наркотыкі

У гэтую ж сераду, 14 студзеня, па матэрыялах Ганцавіцкага РАУС была ўзбуджана крымінальная справа па факце выяўлення наркатычных рэчываў у кватэры дома па вуліцы Кастрычніцкай у горадзе Ганцавічы. Сярод “знаходак” — марыхуана і макавая саломка.

“Хатні” злодзей

18 студзеня ў аператыўны аддзел Ганцавіцкага РАУС паступіла паведамленне ад жыхара вёскі Ясянец Станіслава Т. Мужчына расказаў, што ў яго сужыцелькі сын украў грошы ў суме 700 тысяч рублёў, якія належалі заяўніку.

Праверку па справе праводзіць РАУС.