Важная місія

— Наш цэнтр існуе ўжо дзесяць гадоў, і з іх я з’яўляюся дырэктарам ўжо каля дзевяці з паловай, — адзначыла Наталля Міхайлаўна. — Таму я застала той час, калі давялося рабіць сваімі рукамі ўсё з нуля. Я падбірала калектыў, і з яго дапамогай стварала камфортныя ўмовы для дзяцей — шукала развіваючыя цацкі, закупляла неабходныя прадметы. Асноўнае прызначэнне нашага цэнтра — навучанне і аказанне карэкцыйна-педагагічнай дапамогі дзецям з асаблівасцямі псіхафізічнага развіцця, таму нельга сказаць, што нам даводзілася лёгка. Аднак мы справіліся з усімі цяжкасцямі, і цяпер у цэнтры знаходзяцца на выхаванні ўжо 48 дзяцей. З іх пяцёра дзетак ад 3 да 6 гадоў навучаюцца ў спецыяльнай дашкольнай групе, 13 дзяцей ва ўзросце да 3 гадоў атрымліваюць раннюю комплексную дапамогу, а астатнія 30 ва ўзросце больш за 3 гады проста прыходзяць на заняткі ў цэнтр. А яшчэ мы аказваем усю магчымую дапамогу адміністрацыі і педагогам устаноў адукацыі раёна ў працы з дзецьмі з асаблівасцямі псіхафізічнага развіцця, з’яўляемся для іх свайго роду каардынатарамі ўсіх дзеянняў.

Варта дадаць, што “Цэнтр карэкцыйна-развіваючага навучання і рэабілітацыі” ўжо даўно вядзе базу даных, у якой пазначаны ўсе дзеці з праблемамі развіцця ў нашым раёне. У дадзены момант такіх дзяцей 538, і ўсе яны ахоплены навучаннем або карэкцыйна-педагагічнай дапамогай.

У святле ўсяго пералічанага зразумела, што юбілей цэнтра — значная падзея для нашага раёна. Таму павіншаваць юбіляра прыйшло вельмі шмат людзей. У першую чаргу, вядома, гэта былі прадстаўнікі раённага выканаўчага камітэта — загадчык аддзела адукацыі, спорту і турызму Надзея Здрок, старшыня раённай арганізацыі прафсаюза работнікаў адукацыі і навукі Юрый Андрэйчык, загадчык вучэбна-метадычнага кабінета пры аддзеле адукацыі, спорту і турызму Валянціна Мурашка, метадыст аддзела адукацыі, спорту і турызму Таццяна Радзюк, а таксама кіраўнікі ўстаноў адукацыі, настаўнікі-дэфектолагі, госці, вучні Ганцавіцкай дапаможнай школы-інтэрната і бацькі. Несумненна, усе гэтыя людзі ўжо даўно сталі для цэнтра сябрамі і блізкімі, а таму ў зале панавала вельмі дружалюбная, цёплая атмасфера. Гучалі ўзаемныя падзякі, свяціліся вочы і ззялі ўсмешкі. Якой цяжкай ні была б ноша педагогаў карэкцыйнага цэнтра і бацькоў дзяцей, якія навучаюцца ў ім, гэты дзень нараджэння быў сапраўдным святам для ўсіх. Цяжка ўявіць, якой колькасці дзяцей за гэты невялікі тэрмін дапамаглі педагогі. Гэта іх праца, іх цяжкая ноша, аднак менавіта гэта — іх прызванне.

На здымкУ: дырэктар ДУА “Цэнтр карэкцыйна-развіваючага навучання і рэабілітацыі Ганцавіцкага раёна” Наталля Лойка прымае падарунак ад першага дырэктара цэнтра, а цяпер настаўніка-дэфектолага дзіцячага садка №1 Ларысы Герасіменя.

Фота Аляксандры ГУРМАН.