У кожнай рабоце — цяпло душы

Атмасфера ўтульнасці і цеплыні літаральна перапаўняе выставачную залу краязнаўчага музея. І ствараюць іх экспанаты новай выставы “Научитесь творить чудеса”— сувеніры, крэатыўныя вырабы, падарункі, зробленыя ўмелымі рукамі жыхароў нашага горада і раёна (НА ЗДЫМКАХ). Гледзячы на гэтыя цуды-вырабы, адчуваеш, што створаны яны сапраўднымі майстрамі сваёй справы, творчая фантазія якіх не мае межаў, а якасць работ выклікае непадробнае захапленне.

Цяпер многія ганцаўчане займаюцца рукадзеллем: вяжуць, вышываюць, робяць цацкі і біжутэрыю, ствараюць непаўторныя кампазіцыі з бісеру і многае іншае. Вырабы ручной работы набываюць усё большую папулярнасць, іх выкарыстоўваюць для ўпрыгожання адзення, дэкарыравання інтэр’ераў. На цяперашняй выставе нам хацелася прадставіць розныя віды рукадзелля, паказаць арыгінальнасць, непаўторнасць і прыгажосць вырабаў, створаных людскімі рукамі. У ёй прынялі ўдзел і дапамаглі стварыць у музеі такую чароўную атмасферу каля дваццаці майстроў Ганцаўшчыны, за што мы ім шчыра ўдзячны.

Унікальныя вырабы прапанавала для выставы Лілія Кудравец. Жаночы топ і дамская сумачка, выкананыя шнуравым карункам, чаруюць той прыгажосцю, якую не перадаць словамі. Гледзячы на вытанчаныя размаляваныя талеркі (кропкавы роспіс) Наталлі Фартавой і мініяцюрныя кнігі з паперы ў скураным пераплёце Наталлі Задружнай, немагчыма паверыць, што гэта ўсё тварэнне людскіх рук. Аляксандр Буката “выгадаваў” з манет савецкага часу “грашовае дрэва”, ад якога немагчыма адвесці позірку. Хочацца ўзяць у рукі інтэр’ерныя цацкі, зробленыя Таццянай Канановіч, прытуліць іх да сябе і згадаць сваё дзяцінства. Вырабы з падручных матэрыялаў і вышыўка Алены Рабцэвіч, цудоўныя рэчы з абрэзкаў тканіны Алы Грышчук сведчаць аб іх здольнасці бачыць у, здавалася б, непатрэбных кавалачках тых ці іншых матэрыялаў цікавы ўзор ці вобраз і ўменні па-жаночы рацыянальна выкарыстоўваць гэтыя кавалачкі. Здзіўляюць акуратнасцю і тонкасцю работы дэкупажныя вырабы Леаніды Рапейка. Чароўныя льняныя сурвэткі Галіны Пупач, абвязаныя па краі фігурным беражком, нясуць цяпло яе рук і падымаюць настрой.

Таленавітыя педагогі і выхавальнікі дапаможнай школы-інтэрната прадставілі вырабы, падрыхтаваныя ў разнастайных відах тэхнікі выканання, такіх, як квілінг (скручванне паперы), канзашы (стварэнне кветак з кавалачкаў тканіны), дэкупаж, бісерапляценне. Галіна Валуевіч, Лілія Цыбулька, Інэса Зялёнка, Юлія Муха, Таццяна Ярмолава, Юлія Бачкарова, Таццяна Чыжэўская, Ірына Стрэчка падрыхтавалі для выставы свае дэкаратыўныя рэчы, якія ўнеслі ў яе не толькі вясёлкавую яркасць, але і радасць жаданых свят: Каляд і Новага года.

І гэта зусім не ўсе цуды, якія чакаюць наведвальнікаў на выставе ручной работы. Завітайце ў музей, і вы знойдзеце, я ўпэўнена ў гэтым, штосьці блізкае і роднаснае вашай душы, натоліце яе спатканнем з прыгожым, хоць на імгненне пакінеце ўбаку свае праблемы і трывогі. Дарэчы, у рамках выставы будуць арганізаваны майстар-класы па вырабе разнастайных сувеніраў і падарункаў для сваіх родных, блізкіх, сяброў. Навучымся ж ствараць цуды і падорым добры настрой сабе і іншым!

Наталля КУЛЕШ,

дырэктар раённага краязнаўчага музея.

Фота Алы ПЯТЛІЦКАЙ.