Пра творчасць, якасць, вынік

На базе раённай дзіцячай бібліятэкі прайшоў семінар “Дзіцячая бібліятэка: творчасць, якасць, рэзультат”. Зусім не выпадковай была яго тэма. У век навейшых тэхналогій у друкаваных выданняў узнікла шмат канкурэнтаў, але для дзіцяці кніга была і застаецца неабходнай і важнай крыніцай ведаў. Менавіта яна першай адкрывае юнаму чытачу свет, вучыць суперажываць, быць справядлівым, а задача нас, бібліятэкараў, абудзіць, выхаваць, умацаваць у неакрэплай душы гэтую каштоўную здольнасць. Удзельнікі семінара і сабраліся для таго, каб абмеркаваць хвалюючыя пытанні па далучэнні дзяцей да чытання, падзяліцца вопытам работы па арганізацыі вольнага часу юных чытачоў і разгледзець іншыя надзённыя праблемы.

Сустрэла гасцей і правяла змястоўную экскурсію па бібліятэцы гаспадыня ўстановы — загадчыца Валянціна Мініч.

А падзівіцца тут і сапраўды ёсць чаму. Маляўніча аформленыя стэлажы беларускай літаратуры, духоўнай і ваенна-патрыятычнай кнігі прывабліваюць і захапляюць малечу. На кожнай кніжнай паліцы — цікавыя, прыцягальныя надпісы, міма якіх нельга прайсці. А для самых маленькіх наведвальнікаў бібліятэкі кнігі “дастаўляе” кніжны паравозік. Усюды пануе ўтульнасць  і добразычлівая атмасфера. Фантазію, творчасць і цяпло душы ўкладвае ў работу з наведвальнікамі калектыў дзіцячай бібліятэкі. Нездарма юныя чытачы, а іх налічваецца каля 2000 чалавек, наведаўшыся ў казачны кніжны храм, зноў і зноў прыходзяць сюды.

Пасля прагляду выставачных экспазіцый дырэктар цэнтралізаванай бібліятэчнай сістэмы Ала Хваль запрасіла ўсіх прыняць удзел у тэарэтычнай частцы мерапрыемства. Вопытам работы з дзіцячым чытачом падзяліліся госці семінара — намеснік дырэктара па рабоце з дзецьмі Ляхавіцкай РЦБС Таццяна Арлоўская і бібліятэкар гімназіі г. Ганцавічы Святлана Чэкун.

Пра сваю паўсядзённую працу, якая ператварылася ў сапраўдныя святы для дзетак, гаварыла бібліятэкар раённай дзіцячай бібліятэкі Наталля Наумік. Сельскія бібліятэкары прынялі ўдзел у аўкцыёне бібліятэчных ідэй. Расказвалі з дапамогай мультымедыя пра найбольш яркія мерапрыемствы, якія адбыліся ў час правядзення Тыдня дзіцячай і юнацкай кнігі, летніх і зімовых канікулаў. Удзельнікі семінара пазнаёміліся з інавацыйнымі формамі работы з дзіцячым чытачом, папулярнымі ў свеце, у прыватнасці такімі, як флэшмоб, букросінг, буктрэйлер, старысек.

Шмат цікавай і карыснай інфармацыі адзначылі для сябе прысутныя, паслухаўшы выступленне псіхолага дзіцячага садка № 4 Алены Заяц на тэму псіхалагічных асноў развіцця цікавасці да кнігі ў дзяцей дашкольнага ўзросту. Многія мамы, мабыць, і цяпер не ведаюць, што дзецям да года патрэбна прывіваць любоў да кнігі, чытаць ім услых, а не даваць малышам кніжку толькі дзеля забавы. Толькі сур’ёзны падыход дарослых дапаможа сфарміраваць у дзіцяці аўтаматызм чытання, і бацькі могуць быць спакойнымі за сваіх сыночкаў і дачушак, бо выхавалі асобу, якая ўмее адчуваць, думаць і перажываць.

Кожны з удзельнікаў семінара ўзгадаў гады маленства і ўявіў сябе юным наведвальнікам бібліятэкі, адказваючы на пытанні віктарыны “Што пра кнігу мы ведаем?” З цікаўнасцю паглядзелі ўсе пастаноўку ўзорнага лялечнага тэатра “Усмешка” па творах літаратара-земляка А. Сержпутоўскага. Больш чым 25 гадоў дзейнічае пры раённай дзіцячай бібліятэцы  гэты тэатр і не перастае радаваць гледачоў сваімі ўдалымі пастаноўкамі.

Падводзячы вынікі семінара, яго ўдзельнікі прыйшлі да такой высновы: далучаць да чытання дзіця, падлетка, маладога чалавека — гэта і ёсць іх задача, прафесійны абавязак, выканаць які, падарыць людзям радасць чытання — гонар для кожнага.

Таццяна МАЛЯЎКА,

загадчык аддзела бібліятэчнага маркетынгу цэнтральнай раённай бібліятэкі імя В. Ф. Праскурава.

НА ЗДЫМКУ: у час семінара ў раённай дзіцячай бібліятэцы.

Фота з архіва ўстановы.