З прыцэлам на перспектыву

Зямля любіць руплівых гаспадароў. За клопаты і старанны догляд яна шчодра адорвае багатым ураджаем. Асабліва гэта датычыцца вырошчвання збожжавых і зернебабовых культур. Атрыманне важкага коласа — залог не толькі паспяховага выканання дзяржаўнага заказу, але і трывалы падмурак для дасягнення высокіх надояў малака і прываг у жывёлагадоўлі.

Яскравы прыклад таму — сельскагаспадарчы вытворчы кааператыў “Хатынічы”. Тут ведаюць цану хлебу, дбайна гаспадараць на збожжавых палетках. Таму добрыя вынікі — заканамерныя.

На сёлетнім жніве валавы намалот збожжа пасля дапрацоўкі склаў 3 тысячы 256 тон — на 1 тысячу 121 тону больш за мінулагодні паказчык. Ды і сярэдняя ўраджайнасць з гектара парадавала земляробаў. На круг атрымана 29,6 цэнтнера зерня каласавых, што таксама — на 8,5 цэнтнера —  больш, чым летась.

Старшыня СВК “Хатынічы” Фёдар Куратнік задаволены станам спраў у гаспадарцы. Тут умеюць вырошчваць збожжавыя. Ды і не толькі іх. Узяць, напрыклад, азімы рапс. Гэтая каштоўная алейная культура таксама аддзячыла важкім ураджаем.

На жніве былі задзейнічаны 4 збожжаўборачныя камбайны. Прычым, два экіпажы механізатараў па намалотах перавысілі тысячны рубеж. Камбайнер Мікалай Курловіч разам з памочнікам Уладзімірам Катом выдаў з бункера 1 тысячу 237 тон збожжа з плошчы 428 гектараў. Высокія паказчыкі і ў сямейнага экіпажа ў складзе Мікалая Валуевіча і яго сына Аляксандра.

Добра папрацавалі вадзіцелі Іван Рабцэвіч, Іван Крупеніч і Уладзімір Канановіч. Кожны з іх даставіў на сушыльныя комплексы больш чым тысячу тон зерня. Аператар “КЗС-5” Таццяна Ваўчок перапрацавала 2 тысячы 140 тон збожжа новага ўраджаю і стала пераможцай у абласным спаборніцтве.

Паспяхова ідуць справы і ў жывёлагадоўлі. За 10 месяцаў сёлетняга года валавы надой малака склаў 1 тысячу 848 тон — 105,2 працэнта да адпаведнага перыяду мінулага года. За такі тэрмін у сярэднім ад каровы атрымана 3 тысячы 192 кілаграмы малака — на 215 кілаграмаў больш леташняга. Перавышаны мінулагоднія паказчыкі і па яго рэалізацыі. У заліковай вазе прададзена 1 тысяча 706 тон, што склала 105,6 працэнта.

Галоўны эканаміст гаспадаркі Уладзімір Бабулін адзначае лепшых жывёлаводаў. Сярод іх — загадчыцы малочнатаварных ферм Галіна Наумік і Святлана Бурвель, аператары машыннага даення Ніна Пічыц, Наталля Канановіч, Любоў Рылка і Надзея Дрозд. На адкорме і дарошчванні буйной рагатай жывёлы добра спраўляюцца са сваімі абавязкамі загадчыца цэнтральнай фермы Алена Ярашэвіч, жывёлаводы Вольга Канановіч і Марыя Шамрыла.

На стойлавы перыяд у гаспадарцы назапасілі на ўмоўную галаву жывёлы 22,7 цэнтнера кармавых адзінак, што таксама больш чым летась. На нарыхтоўцы кармоў вызначыліся механізатары Міхаіл Мінько, Мікалай Канановіч, Уладзімір Ярашэвіч і Мікалай Мінько.

Што і гаварыць, сваё прафесійнае свята калектыў СВК “Хатынічы” сустракае з добрым настроем. Аднак ёсць і праблемы. Галоўная з іх — недахоп жывёлагадоўчых памяшканняў. Патрабуе таксама абнаўлення машынна-трактарны парк. Каб паспяхова вырашаць надзённыя задачы, трэба не заспакойвацца на дасягнутым, працаваць з прыцэлам на перспектыву. Гэта добра ўсведамляюць як галоўныя спецыялісты на чале з кіраўніком гаспадаркі, так і радавыя работнікі.

Міхась АРЭШКА.

НА ЗДЫМКУ: старшыня СВК “Хатынічы” Фёдар Куратнік гутарыць з механізатарамі Уладзімірам Ярашэвічам (злева) і Мікалаем Мінько.

Фота аўтара.