Мікалай ПАЎЛОВІЧ: “У нас працуюць прафесіяналы”

У студзені 2013 года філіял “Аўтамабільны парк № 7 г. Ганцавічы” далучылі да філіяла “Аўтамабільны парк № 10 г. Лунінца” ААТ “Брэстаблаўтатранс”.

Мікалай Паўловіч узначальвае ўчастак “Ганцавічы” з пачатку далучэння да аўтапарка № 10 г. Лунінца. Што змянілася за гэтыя амаль два гады?

— Зараз мы з’яўляемся структурным падраздзяленнем аўтапарка № 10 г. Лунінца, — гаворыць  Мікалай Мікалаевіч. — Па гэтай прычыне фінансава-эканамічную дзейнасць немагчыма прааналізаваць асобна па ўчастку. У нас адна бухгалтэрыя ў Лунінцы, агульны аддзел перавозак. Ён забяспечвае работай вадзіцеляў аўтамабіляў. Грузаперавозкі ажыццяўляюцца як па тэрыторыі Беларусі, так і за яе межамі, у асноўным у Расію і Украіну.

Пасля далучэння ў нас прыкметна павялічылася заработная плата. Напрыклад, вадзіцелі аўтобусаў і грузавых аўтамабіляў за месяц атрымліваюць да 8 мільёнаў рублёў. Гэта больш, чым у начальніка ўчастка і інжынерна-тэхнічных работнікаў. Я лічу, што так справядліва, бо ўвесь цяжар па бяспечных перавозках пасажыраў і дастаўцы грузаў кладзецца на вадзіцеляў. Ніжэйшы заробак у абслугоўваючага персаналу. Карацей кажучы, розныя катэгорыі работнікаў атрымліваюць і розную зарплату.

Імкнемся, па меры магчымасці, абнаўляць машынны парк участка. Так, сёлета за ўласныя сродкі набылі два аўтобусы “МАЗ-103” і “МАЗ-241” для гарадскога і прыгараднага маршрутаў. Дарэчы, увесь транспарт знаходзіцца ў тэхнічна спраўным стане.

Калектыў участка складаецца з 45 чалавек. На ацяпляльны сезон дадаткова працаўладкоўваем чатыры качагары. Мікраклімат у калектыве добры, людзі працаздольныя, прафесіяналы сваёй справы. Мы пастаянна адчуваем падтрымку і разуменне з боку Ганцавіцкага райвыканкама і райсавета.

Не сакрэт, што пасажырскія перавозкі заўсёды былі і, напэўна, застануцца стратнымі. У мэтах кампенсацыі райвыканкам выдзяляе датацыі. Існуюць сацыяльныя стандарты, якія мы абавязаны выканаць і выконваем на 100 і больш працэнтаў. Узнікаючыя праблемы стараемся вырашаць унутры працоўнага калектыву.

За 9 месяцаў перавезена 507 тысяч пасажыраў.

Сярод лепшых вадзіцеляў аўтобусаў кіраўнік адзначае Аляксандра Лойку, Уладзіміра Юрчанку і Аляксандра Каўша. На грузавых аўтамабілях выдатна працуюць Уладзімір Барысевіч, Сяргей Спосаб і Міхаіл Кісялевіч. Ды і слесары Іван Кавальчук і Мікалай Жыжа зарэкамендавалі сябе вопытнымі і ўмелымі спецыялістамі.

Сярод работнікаў Ганцавіцкай аўтастанцыі стараннем вызначаюцца білетныя касіры Аксана Занька і Валянціна Ціхан, прыбіральшчыца службовых памяшканняў Анжаліка Ненька.

— Жадаю ўсім работнікам і ветэранам участка далейшых поспехаў у працы, моцнага здароўя, сямейнага дабрабыту, — зазначыў у канцы размовы Мікалай Паўловіч. — Шчаслівых і бяспечных дарог вам, аўтамабілісты!

Міхась АРЭШКА.

НА ЗДЫМКУ:  вадзіцелі пасажырскага аўтобуса “МАЗ-103” Уладзімір Юрчанка (злева) і Аляксандр Коўш.

Фота аўтара.