Халады не засталі знянацку

13 кастрычніка выйшла распараджэнне райвыканкама аб пачатку ацяпляльнага сезона 2014 — 2015 гадоў. На яго падставе і згодна з правіламі падрыхтоўкі да асенне-зімовага перыяду пры тэмпературы 10 градусаў цяпла і ніжэй, да ацяплення падключаюцца аб’екты сацыяльнага прызначэння з кругласутачным знаходжаннем людзей (бальніцы, дзіцячыя садкі, школы). А пры тэмпературы 8 градусаў цяпла і ніжэй —  жыллёвы фонд. Пасля ўказаных аб’ектаў могуць падключацца адміністрацыйныя і прамысловыя будынкі.

— З 17 кастрычніка ў раёне было пададзена цяпло да першых сацыяльных аб’ектаў — дапаможнай школы-інтэрната, сацыяльнага прытулку і  раённай бальніцы, — расказвае начальнік участка кацельнай гаспадаркі Ганцавіцкай  РЖКГ Юрый Колас. — А з 18 кастрычніка былі падключаны  да ацяплення аб’екты адукацыі. Адначасова камунальная служба  пачала падключаць жыллёвы фонд.

Падрыхтоўка да ацяпляльнага сезона вялася згодна з правіламі падрыхтоўкі і правядзення асенне-зімовага перыяду энергазберагаючымі арганізацыямі і спажыўцамі цеплавой энергіі, зацверджанымі пастановай Міністэрства энергетыкі і Міністэрства ЖКГ Рэспублікі Беларусь ад 6 чэрвеня 2012 года № 2718.

На балансе камунальнікаў зараз знаходзяцца 13 кацельняў, 8 цэнтральных цеплапунктаў і 45 кіламетраў цеплавых сетак.  Усе спажыўцы атрымалі адпаведныя акты і пашпарты гатоўнасці. З дапамогай падраднай арганізацыі ААТ “Брэстбудгаз” да 1 кастрычніка былі заменены 3 кіламетры цеплавых сетак, праведзены прафілактычныя рамонты кацельнага абсталявання і цэнтральных цеплавых пунктаў, унутрыдамавых сістэм ацяплення. На ўсіх кацельнях створаны неабходныя запасы паліва. У Хатынічах старыя чыгунныя катлы былі заменены на больш эфектыўныя, з высокім каэфіцыентам карыснага дзеяння. У Вялікіх Круговічах вядзецца перападключэнне мясцовай сярэдняй школы да  камунальнай кацельні. Пакуль гэтая навучальная ўстанова абаграваецца ўласнай кацельняй.

— Вялікая просьба да жыхароў, якія карыстаюцца паслугамі цэнтралізаванага ацяплення, — гаворыць Юрый Колас, — цярпліва, з разуменнем аднесціся да часовых нязручнасцей, аператыўна паведамляць аб уцечках і няспраўнасцях ацяпляльных прыбораў. Неабходна памятаць, што сістэма ацяплення з’яўляецца складанай канструкцыяй і ўключыць яе хутка немагчыма, патрабуецца не менш пяці сутак. Акрамя таго, узнікае неабходнасць ухіляць уцечкі, выяўленыя ў час пуску ацяплення. Работа карпатлівая, патрабуе вялікіх намаганняў камунальнікаў. Галоўнае, што да наступлення халадоў усе аб’екты падрыхтаваны  своечасова  і якасна.

Міхась АРЭШКА.