“Ганцавіцкі футбол: спорт, азарт і адпачынак”

Выстава пад такой назвай пачала сваю работу ў выставачнай зале раённага краязнаўчага музея з 7 кастрычніка.

На выставе сабраны шматлікія дакументы, рэчы, фотаздымкі, звязаныя з гісторыяй ганцавіцкага футбола, а таксама ўзнагароды, прызы, кубкі, якія заваявалі ганцавіцкія футбольныя каманды ў розныя часы на раённых, абласных і рэспубліканскіх спаборніцтвах.

Экспазіцыя выставы складаецца з чатырох частак. Першая датычыцца школьнага і дзіцяча-юнацкага футбола. Другая прысвечана міні-футболу і футзалу. Трэцяя частка  расказвае пра раённыя спаборніцтвы па футболе, якія пасля доўгага перапынку пачалі праводзіцца на Ганцаўшчыне з 2013 года. Нарэшце, апошняя і самая вялікая частка, прысвечана поспехам і дасягненням ганцавіцкіх футбольных каманд на абласным і рэспубліканскім узроўнях, а таксама ўдзелу ганцаўчан у міжнародных спаборніцтвах.

Як расказаў галоўны захавальнік фондаў раённага краязнаўчага музея Віталь Герасіменя, вялікую дапамогу ў зборы матэрыялаў для выставы аказалі вядомы ў раёне футбаліст і трэнер Андрэй Жалезны, дырэктар ДЮСШ ППА СВК “Агарэвічы” Дзмітрый Матуліс, ганцаўчанін Валянцін Міхейкін, а таксама футбольныя і міні-футбольныя каманды раёна “Будаўнік — ПМК-14”, “Хатынічы” і “Студэнты”. Унеслі свой уклад у арганізацыю выставы і фанаты ФК “Ганцавічы”, якія на час яе правядзення прынеслі ў музей банэр нашага футбольнага клуба.

Па словах Віталя Герасімені, на выставе сабраны матэрыялы толькі канца 90-х — 2000-х гадоў, а вось пра гісторыю развіцця футбола на Ганцаўшчыне, напрыклад, у савецкія часы амаль нічога не вядома. Паважаныя жыхары раёна, у каго захаваліся дакументы, фотаздымкі і іншыя матэрыялы, якія датычыцца гісторыі ганцавіцкага футбола, звяртайцеся ў раённы краязнаўчы музей. Яго супрацоўнікі будуць вельмі ўдзячныя ўсім, хто дапаможа ў зборы неабходнай інфармацыі.

Выстава “Ганцавіцкі футбол: спорт, азарт і адпачынак” будзе працаваць, як мінімум, да канца кастрычніка. Запрашаем усіх прыхільнікаў гульні нумар адзін у раённы краязнаўчы музей пазнаёміцца з гісторыяй ганцавіцкага футбола.

НА ЗДЫМКУ: у выставачнай зале раённага краязнаўчага музея падчас выставы “Ганцавіцкі футбол: спорт, азарт і адпачынак” .

Тэкст і фота

Уладзіміра САКАЛОВА.