“Зробім!” — час навядзення парадку

2 кастрычніка прайшла сусветная экалагічная акцыя “Зробім!”, да якой далучылася і наша краіна. На Ганцаўшчыне ў гэты дзень таксама прайшло шмат мерапрыемстваў па навядзенні парадку на тэрыторыі населеных пунктаў, у лясах і прыбярэжных зонах вадаёмаў раёна.

Так, на тэрыторыі пляжа “Паўднёвы” парадак наводзілі работнікі райвыканкама. Нягледзячы на даволі халоднае надвор’е, яны ўжо з самай раніцы, пад кіраўніцтвам намеснікаў старшыні райвыканкама Уладзіміра Рапейкі і Артура Грыгарана, шчыравалі на гарадской зоне адпачынку. На пляжы працавалі таксама педагогі і навучэнцы дапаможнай школы-інтэрната.

Далучыліся да акцыі і іншыя навучальныя ўстановы Ганцаўшчыны. Дзеці разам з настаўнікамі прыбіралі прышкольныя тэрыторыі, гульнявыя пляцоўкі ў дзіцячых садках.

Актыўны ўдзел у акцыі прынялі таксама арганізацыі, прадпрыемствы і ўстановы Ганцаўшчыны. Так, напрыклад, работнікі лясгаса наводзілі парадак на тэрыторыі прадпрыемства і на прыбярэжных тэрыторыях азёр Чырвонае, Дубаўское і, канечне, на сваіх лясных угоддзях. А работнікі РЖКГ разам з аддзеламі адукацыі, спорту і турызму і ідэалагічнай работы, культуры і па справах моладзі райвыканкама прыбралі лясны масіў ва ўрочышчы Горкі. Парадак у горадзе і на тэрыторыі сваіх прадпрыемстваў наводзілі работнікі РЖКГ, райспажыўтаварыства, КПД, ПМС, ПМК-14, “Ганцавічырайгазу”, “Модуля”, “ДРБУ-100” і інш. Плённа папрацавалі ў гэты дзень і жыхары сельскіх населеных пунктаў.

Таксама ў гэты дзень работнікамі РЖКГ на палігонах нашага раёна актыўна праводзілася работа па ліквідацыі несанкцыянаваных звалак адходаў, быў арганізаваны маштабны збор другаснай сыравіны.

Прыемна, што акцыя “Зробім!” становіцца на Ганцаўшчыне традыцыйнай. І хочацца, каб наш раён заставаўся такім жа чыстым, прыгожым, утульным і добраўпарадкаваным, як і пасля правядзення гэтай акцыі.

Уладзімір САКАЛОЎ.