Праваднога радыё больш няма…

1 кастрычніка на Ганцаўшчыне поўнасцю адключаецца правадное радыё, па якім трансліраваўся “Першы Нацыянальны канал Беларускага радыё”.

Пераход на эфірнае вяшчанне ў FM-дыяпазоне пачаўся яшчэ ў лістападзе 2013 года. Адключэнне праваднога радыё ішло паступова — пасля рэканструкцый ліній электраперадач правады, па якіх вялася трансляцыя, не абнаўляліся. У выніку да апошняга часу правадное радыё працавала ў часткі карыстальнікаў нашага райцэнтра, а таксама ў вёсцы Хатынічы. Цяпер жа яно поўнасцю будзе адключана.

На сённяшні дзень “Першы Нацыянальны канал Беларускага радыё” жыхары раёна, у залежнасці ад знаходжання, могуць слухаць на некалькіх FM-частотах. Трансляцыі вядуцца з рэтрансляцыйных станцый: Слонім — на 106,5 FM, Капыль — 102,3 FM, Пінскі раён — 104,5 FM, Салігорск — 100,3 FM. Адпаведныя эфірныя і УКХ-прыёмнікі свабодна прадаюцца ў гандлёвых кропках раёна.

Акрамя гэтага, тыя людзі, хто набыў прыстаўку для лічбавага тэлевяшчання (яно таксама трансліруецца са згаданых станцый), разам з сацыяльным пакетам у 8 тэлепраграм могуць па тэлевізары слухаць “Першы Нацыянальны канал Беларускага радыё”.

Звяртаем увагу жыхароў Ганцаўшчыны, што праграма раённага радыё “Будні Ганцаўшчыны” з 1 кастрычніка 2014 года цяпер трансліруецца на частаце 106,5 FM і будзе выходзіць два разы на тыдзень: у аўторак — 6.25 — 6.40 і чацвер — 22.05 — 22.30.

Дарэчы, як адзначыў начальнік раённага вузла электрасувязі Анатоль Гардзей, пытанні з прыёмам эфірнага радыё на Ганцаўшчыне вырашальныя, варта толькі набыць стацыянарны эфірны ці УКХ-прыёмнік і выбраць частату, дзе “Першы Нацыянальны канал Беларускага радыё” транслюецца без перашкод. Што датычыцца эфірнага лічбавага телевізійнага вяшчання, то Анатоль Фёдаравіч абнадзейвае тых карыстальнікаў, у каго па раёне ёсць няўпэўнены прыём телепраграм: у 4 квартале 2014 года на Ганцаўшчыне плануецца ўвесці ў эксплуатацыю аўтаматызаваную радыётэлевізійную перадаючую станцыю. Яна будзе ўзведзена ў райцэнтры — у раёне камбіната панэльнага домабудавання — і дасць магчымасць прымаць упэўнены тэлевізійны сігнал па ўсім раёне.

Аляксей ГРУШЭВІЧ.