Бервяном… па аўтамабілі

Памяты бервяном аўтамабіль “Аўдзі-100” — такі вынік здарэння, якое адбылося надвячоркам у чацвер, 25 верасня, на вуліцы Янкі Купалы ў райцэнтры.

А палове шостай гадзіны вечара па вуліцы ехаў лесавоз, які перавозіў хлысты (ствалы зрэзаных дрэў). Адзін з іх стаў упоперак і ўжо камлём цягнуўся па зямлі. На яго шляху аказаўся аўтамабіль, прыпаркаваны на абочыне дарогі. Ад удару “Аўдзі” атрымала даволі сур’ёзныя пашкоджанні. Бервяно ад сутыкнення ажно звалілася на праезную частку, а праз некалькі дзясяткаў метраў спыніўся і лесавоз.

Журналісту “СП” давялося паразмаўляць з непасрэдным сведкам здарэння. “Я ехаў за лесавозам, у ім бервяно стала ўпоперак і, звісаючы, перагароджвала праезную частку амаль да плоту. Я спрабаваў папярэдзіць вадзіцеля, але не атрымалася, — расказаў мужчына. — Добра хоць, што людзі не пацярпелі. Па дарозе ішлі якраз дзве жанчыны — ледзь паспелі адскочыць!…”.

Як расказаў інспектар аддзялення ДАІ РАУС Максім Лелес, здарэнне адбылося ў 17 гадзін 35 хвілін. Калі на месца прыбылі супрацоўнікі ДАІ, іх ужо чакалі: гаспадар памятага аўтамабіля, вадзіцель лесавоза і прадстаўнікі лесапункта прадпрыемства “Пінскдрэў”, якому належыць лесавоз.

“Будзе праведзена разбіральніцтва і па яго выніках дадзена прававая ацэнка па гэтай справе”, — адзначыў Максім Лелес.

Па тым, як упаў хлыст на “Аўдзі”, відаць, што яго загрузілі на лесавоз няправільна — камлём назад і тоўсты канец бервяна свабодна матляўся. Улічваючы, што дарогі ў залінейнай частцы райцэнтра не вызначаюцца гладкасцю, нічога дзіўнага няма ў тым, што хлыст перакасіўся і стаў упоперак.

Безумоўна, сітуацыя вельмі непрыемная, але, з другога боку, добра, што ніхто з людзей не пацярпеў. А гэтае здарэнне — трывожны званочак усім, хто не захоўвае тэхніку бяспекі.

Аляксей Грушэвіч.

На здымку: на месцы здарэння.

Фота аўтара.