Пачаўся абласны месячнік па зборы і нарыхтоўцы другаснай сыравіны

Пачаўся абласны месячнік па зборы  і нарыхтоўцы другаснай сыравіны.

Транспартаваннем і дастаўкай яе на перапрацоўку займаюцца жыллёва-камунальная гаспадарка і райспажыўтаварыства.

— У ходзе месячніка асаблівую ўвагу трэба звярнуць на збор макулатуры і адходаў шкла, — падкрэслівае намеснік старшыні райвыканкама Артур Грыгаран.

Для цвёрдых бытавых адходаў у раёне абсталяваны 24 палігоны.  Работнікам жыллёва-камунальнай службы неабходна  ўдзяляць ім большую ўвагу. Не сакрэт, што  адтуль, пасля сартавання, можна вывезці дзясяткі тон макулатуры і шклабою.

У горадзе для другаснай сыравіны  адведзены 30 пляцовак. На іх устаноўлены кантэйнеры: з круглымі адтулінамі —   для пластыкавых і шкляных бутэлек, з прамавугольнымі — для макулатуры.  Вываз харчовых адходаў вядзецца цэнтралізавана, згодна з графікам. У прыватны сектар камунальнікі могуць выехаць у любы час сутак. Трэба толькі патэлефанаваць па нумары 115.

— На жаль, не ўсе жыхары горада  выконваюць нашы патрабаванні, не клапоцяцца аб чысціні і акуратнасці, — гаворыць намеснік дырэктара раённай жыллёва-камунальнай гаспадаркі Сяргей Вайцешык. — Здавалася б, чаго прасцей: макулатуру — у адзін кантэйнер, пластыкавыя і шкляныя бутэлькі — у другі. Дык не. Вось і даводзіцца нашым рабочым пастаянна сартаваць другасную сыравіну.

Адзначым, што  бытавыя адходы  —  макулатуру, шклабой і пластыкавыя вырабы — жыхары могуць здаваць у райспажыўтаварыства, тым самым папаўняючы свой бюджэт. Трэба толькі мець жаданне. 1 кілаграм шклабою каштуе 600 рублёў, такая ж вага макулатуры — 800, а кілаграм поліэтылену — 1000 рублёў. Згадзіцеся, выгадна.

— Аднак людзі не вельмі актыўна здаюць другасную сыравіну, — адзначае эканаміст райспажыўтаварыства Таццяна Сідаровіч. — За 8 месяцаў сёлетняга года  гадавы план па нарыхтоўцы  шклабою выкананы толькі на 30,8 працэнта,  макулатуры — на 54,7 працэнта.

Трэба ўсвядоміць, што ўтылізацыя і перапрацоўка бытавых адходаў з’яўляецца адной з актуальных праблем. Калі папярэднія пакаленні пакінулі нам у спадчыну ўнікальныя помнікі архітэктуры і мастацтва, дык мы рызыкуем “падарыць” сваім нашчадкам горы смецця.

Міхась АРЭШКА.