У В. Круговічах амбулаторыя стане ФАПам

У Вялікіх Круговічах на мінулым тыдні прайшоў сход жыхароў вёскі, на якім абмяркоўвалася рэарганізацыя мясцовай амбулаторыі ў фельчарска-акушэрскі пункт.

Будынак амбулаторыі стаў непрыгодным — ён татальна пашкоджаны грыбком. Пасля абследавання раённы цэнтр гігіены і эпідэміялогіі вынес пастанову аб забароне яго выкарыстання. Для таго каб захаваць медыцынскае абслугоўванне насельніцтва на належным узроўні, раённым выканаўчым камітэтам было вырашана на частцы тэрыторыі дзіцячага садка і разгарнуць медустанову. Улічваючы, што свабодныя памяшканні там не дазваляюць гэтага зрабіць, а таксама насельніцтва вёскі пастаянна змяншаецца і нагрузка на медработнікаў невысокая, запланавана амбулаторыю рэарганізаваць у ФАП. Гэта абмяркоўвалася сёлета яшчэ ў сакавіку на сходзе грамадзян па месцы жыхарства. Здаецца, знойдзена прымальнае рашэнне, якое дазволіць людзям і надалей атрымліваць неабходны комплекс медыцынскіх паслуг. Але…

Не так даўно была напісана скарга Міністру аховы здароўя Рэспублікі Беларусь наконт закрыцця амбулаторыі. Маўляў, людзі застануцца кінутымі на волю лёсу. Каб расставіць усе кропкі над “і” праводзіўся чарговы сход у Вялікіх Круговічах. На яго сабраліся амаль усе жыхары. І гэта не дзіўна. Запушчаная праз “сарафаннае радыё” пагалоска, што вяскоўцы застануцца без медабслугоўвання, нікога не пакінула раўнадушным. Нават калі галоўны ўрач УАЗ “Ганцавіцкая ЦРБ” Вадзім Сашко і ў чарговы раз растлумачылі, чаму будынкам амбулаторыі карыстацца нельга, прагучалі прапановы будаваць новы. Прабачце, але новы будынак абыдзецца ў суму больш за 6 мільярдаў рублёў і гэта на фоне таго, што па аб’ектыўных прычынах насельніцтва вёскі змяншаецца. Безумоўна, можна настальгіраваць па мінулым і ўспамінаць, як добра жылося на вёсцы гадоў 30 назад, але трэба зыходзіць з сённяшніх рэалій жыцця. Ва ўсім свеце насельніцтва паступова перабіраецца ў гарады. Тое ж адбываецца і ў нас. Варта толькі ўспомніць, што ў савецкія часы 70 працэнтаў беларусаў жылі ў сельскай мясцовасці, зараз — каля 30.

Задача ўлады — стварыць для людзей сяла найлепшыя ўмовы пражывання,у тым ліку і даступнасць медыцынскага абслугоўвання. Для гэтага і вырашана: ФАПы на тэрыторыі Агарэвіцкага сельсавета будуць далучаны да амбулаторыі ў аграгарадку Агарэвічы. Урач штодзённа будзе наведваць ФАПы ў Вялікіх Круговічах і Кукаве, а ў Мельніках — адзін раз на месяц. Таксама застанецца магчымасць здаць для абследавання і неабходныя аналізы, прайсці кардыяграму. Больш таго, у Вялікіх Круговічах захаваецца і стаматалагічны кабінет.

У той жа час, як запэўніў кіраўнік УАЗ “Ганцавіцкая ЦРБ” Вадзім Сашко, пры рэарганізацыі амбулаторыі ў ФАП, ні адзін медработнік не застанецца без работы.

Аляксей ГРУШЭВІЧ.