Пераразлік за ваду

Інцыдэнт, калі на працягу двух дзён, 20 і 21 жніўня, у дамах гараджан з кранаў цякла вада з вельмі непрыемным пахам, выклікаў вялікі рэзананс. Работнікі жыллёва-камунальнай гаспадаркі, з-за неналежнага выканання абавязкаў якіх гэта атрымалася, былі прыцягнуты да дысцыплінарнай адказнасці. І, як стала вядома, камунальнікамі будзе зроблены пераразлік, і за згаданыя дні, грошы за карыстанне вадой з гараджан брацца не будуць.

Адміністрацыя раённай жыллёва-камунальнай гаспадаркі яшчэ раз прыносіць свае прабачэнні за ўзнікшыя праблемы з якасцю вады і ў далейшым будзе імкнуцца прадастаўляць паслугі на высокім узроўні.

У сваю чаргу, пасля публікацыі артыкулаў у “Савецкім Палессі” на згаданую тэму ў рэдакцыю газеты звярнуліся жыхары вёскі Люсіна з праблемай, якая датычыцца таксама якасці пітной вады.

Днямі ў газету “Савецкае Палессе” звярнулася жыхарка аграгарадка Люсіна. Жанчына расказала аб тым, што ў яе няма вады. Дакладней, вада ёсць, але піць яе немагчыма. Справа ў тым, што цэнтральны водаправод у аграгарадку пракладзены да сярэдзіны вуліцы Савецкай і ў пачатку вуліцы Піянерскай, але да дамоў ваду не падвялі. Жыхары сталі чакаць, калі трубы пракладуць непасрэдна да іх жылля, а пакуль паставілі сабе калонкі. Але праблема не вырашылася. Вада з іх цячэ брудная, з непрыемным пахам. Грамадзяне, у якіх такая ж самая бяда, сабраліся і звярнуліся ў санітарна-эпідэміялагічную службу, супрацоўнікі якой, узяўшы пробы з калонкі, параілі для піцця ваду не выкарыстоўваць. “Мы вымушаны ўсё ж мыцца гэтай ванючай вадой. А што рабіць? Піць яе мы не можам, для гэтага купляем ваду, або носім у вёдрах ад іншых людзей. Калі нам падвядуць у дамы нармальную ваду? Ёсць жа такая праграма, “Чыстая вада” называецца. Згодна з ёй, РЖКГ нам абавязана пракласці водаправод”, — зрабіла вывад жанчына.

Па каментарыі і тлумачэнні па дадзеным пытанні мы звярнуліся да старшыні Люсінскага сельвыканкама Вячаслава Шкута. Ён паведаміў, што, згодна з “Праграмай па водазабеспячэнні і водаадвядзенні “Чыстая вада” Ганцавіцкага раёна на 2012 — 2015 гады” ў 2012 годзе пачалася пракладка цэнтральнай лініі водаправода ў аграгарадку. Трубы водазабеспячэння пралажылі. Засталося толькі падвесці іх ад цэнтральнага водаправода непасрэдна да дамоў. Гэтая работа выконваецца ўжо за кошт спажыўцоў.

Людзі абурыліся, таму ў 2013 годзе быў арганізаваны сход для вырашэння дадзенай праблемы, на якім грамадзянам параілі аб’яднацца ў кааператыў і падключыць да цэнтральнага водазабеспячэння свае дамы за асабісты кошт. Люсінцы адмовіліся і вырашылі чакаць 2015 года, спасылаючыся на тое, што менавіта тады заканчвае сваё дзеянне праграма “Чыстая вада”, вынікам якой павінна з’явіцца падключэнне іх за дзяржаўныя грошы да цэнтральнага водаправода.

Расставіць усе кропкі над “і” мы папрасілі галоўнага інжынера Ганцавіцкай РЖКГ Васіля Жалезнага: “Людзі павінны зразумець, што мы, згодна з праграрамай “Чыстая вада”, абавязаны забяспечыць іх толькі вулічнай сеткай водазабеспячэння, добрай якасцю вады, яе бесперабойнай падачай, што мы і зрабілі. А падвод вады да сваіх дамоў жыхары павінны ажыццяўляць за свой кошт: або кожны сам сабе, або, аб’яднаўшыся ў кааператыў, што больш выгадна ў матэрыяльным плане”.

Ксенія ЛУЦКО.